No.4454/2021-2022

Aizawl the 30th March, 2022 : Vawiin khan I&PR Conference Hall, Mamit-ah Agricultural Technology Management Agency (ATMA) buatsaihin nihnih awh training kuthnathawktute tan neih a ni a. Pu Lalnunhlua, District Bawrhsap/ Chairman, ATMA Governing Board chuan khuallian niin he hun hi a hmanpui.

Khuallian Pu Lalnunhlua chuan kan thlai tharte hlawk zawka kan tharchhuah theih nana training buatsaih a ni chu lawmawm a tih thu a sawi a. Zirtirna tha tak dawng mah ila, tihtakzetna leh taimakna nena kan bawhzui loh chuan hlawhtlinna tak tak a awm theih loh thu a sawi. Sawrkar Flagship Programme SEDP hnuaia kan thlai chin turte hlawhtling zawka kan tharchhuah theih nan taima leh thahnemngai taka training turin kalkhawmte a chah a ni.

District Bawrhsap chuan loneitute'n hlawk zawka thlai an tharchhuah theih nan a chi-in emaw a dang pawh nise, kan supply chu a tha tur a ni tiin hemi kawngah hian fimkhur a tul thu a sawi. Kuthnathawktute leh mithiamte inpawhna tha tak neih a tul a, Office-a thawktute chu englai pawha kuthnathawktute dawr theih ni reng turin a chah bawk.

Dr. M. Chinlampianga, Project Director (ATMA) chuan Mamit District chhunga kuthnathawktute thlai chin hrang hrangte leh a hlawhtlinna awmte a lem nen a entir bawk.

He hunah hian Resource Person Dr. Rebecca Lalmuanpuii, Subject Matter Specialist, KVK Lengpui chuan "Improved packages of Practices of Maize and it's quality seed Production techniques" tih thupui hmangin Vaimim chin dan leh a enkawl zui dan kalkhawmte zirtirna a pe a. Pi Lalhruaizeli, Technical Officer (FOCUS), Mamit chuan "Improved package of Practices of Soyabean Cultivation" tih thupui hmangin Bekang chin dan zirtirna a pe a. Dr. Rohit Shukla, Subject matter Specialist, KVK Lengpui chuan "Improved packages of practices of French Bean (var.Zorin Bean) tih thupui hmanga zirtirna pein Pu Vanlalhruaia, SMS (Plant Protection), KVK Lengpui chuan "Integrated Pest Management in Agricultural Crops (Rice, Maize, Zorin Bean) tih thupui hmangin kalkhawmte zirtirna a pe bawk.

He hun hi Pu Zokhuma Varte, DAO, Mamit-in kaihruaiin Pu Lalbiakthanga Pachuau, Dy. Director & District Project Manager, FOCUS chuan lawmthu sawina a nei a. Training hi naktukah chhunzawm leh tur a ni ang.