No.4453/2021-2022

Aizawl, the 30th March 2022: Sawrkar laipui dawra Delhi cham mek, Governor Hari Babu Kambhampati chuan vawiin khan ama Twitter handle kaltlangin "Best Panchayat Village for North East Zone" lawmman dawngtu, Sialsir khua, Serchhip District chu a lawmpui.

Governor Hari Babu Kambhampati chuan Sialsir khaw mipui chu Mizoram mipuiin kan lawmpui a, kan chhuang hle a ni a ti a. Thingtlang khaw dang te pawhin Sialsir khaw mipuite hlawhtlinnah hian entawn tur tha tak an nei a ni a ti.

Nimin khan Ministry of Jal Shakti, Department of Water Resources, River Development & Ganga Rejuvenation buatsaih 3rd National Water Award 2022 semna leh Jal Shakti Abhyan - Catch The Rain 2022 hawnna chu New Delhi-ah neih a ni a. He hunah hian President Ramnath Kovindh khuallian a ni.

3rd National Water Award 2022 semna hunah hian Sialsir khua chuan North East Zone-ahTuihna humhalh tha lawmman pakhatna, an dawng a. He lawmman hi Sialsir khaw mipuite aiawhin Pi Nazuk Kumar, Serchhip District Bawrhsap chuan a dawng a. District Bawrhsap hi Sialsir VCP Pu Vanlalrema leh Pu Samuel Lallawmzuala, District Co-ordinator SBM Gramin ten an tawiawm a ni.

Vawiinah tho khan Governor leh Pi B.Sangkhumi, Padma Shri Awardee te chu an inkawm a. Pi B.Sangkhumi hian Governor hnenah hian Lok Sabha-ah presentation a pek chungchang te a hrilh a ni.