594/2023-2024

Dated Aizawl the 26th May, 2023 : Tukin khan Deputy Chief Minister in Chite Playground lungphum, Chite Veng Aizawl-ah a phum.

He lungphum phumna program-ah hian Deputy Chief Minister Pu Tawnluia chu Khuallian niin tun hnaia Aizawl Smart City hnuaia Projects chi hrang hrang lungphum phum a ni thei chu a lawmawm hle a ni a ti a, Chite Playground sak a ni tur chu Chite veng mipui te a lawmpui thu a sawi bawk. Deputy Chief Minister chuan Smart City Project chungchang pawh sawiin Smart city hnuaia project ho chu Department pakhata insawrbing a nilo a, Department chi hrang hrang, an Department mil a hna thawh ngai te a ni a, heng atan hian a Department kaihhnawih ho te nen pawh committee siam a ni, a ti.

Khuallian chuan sawrkarin thalaite rualawt a an awm a hlau hle a, kawng hrang hrangah hmasawnna an neih theih nan hmanrua chhawpchhuah sak chu a tum ber a ni a, chuvang chuan Chite venga Playground changtlung tak din a ni tur hi Chite veng leh a chhehvel mai nilo, Mizoram thalai ten an hmang tangkai zel dawn a ni, a ti a, Chite veng mipui te chu a enkawlna leh tuaihnum zelna kawngah neitu chan chang a, rilru zau tak pu a sawrkar thahnemngaihpui turin a ngen a ni.

Khualzahawm Sports and Youth Services Minister Pu Robert Romawia Royte pawhin thu sawiin tukin zinga an playground lungphum chu Chite veng mai nilo in rampum huap rotling a ni, a ti. Sawrkarin a football field a siam ho hi mamawhna sang lutuk vang a ni a ti a, tun hnaiah football field tamtak chu hun engemaw ti chhung atan book lawk vek tawh a ni, a ti a, hei hian mipui ten kan playground te kan chhawr tangkai hle tih a ti chiang a ni, a ti bawk. Football in thalai tamtak tan eizawnna a thlen leh footballer ten an sum siam te ngaihtuah in Mizorama industry lian ber pawl ah chhiar loh theih loh a ni, a ti.

Sports Minister chuan tun kum reilo te chhunga sports mai nilo thil dang ah pawh infrastructure in hmasawnna nasa tak a hmu chu a lawmawmin zir chian tham a ni, a ti bawk. Chite veng mipuite hnenah pawh Bialtu MLA a nihna angin an bial chhunga project lian tham a awm chu a lawm thu sawiin a tihhlawhtlin leh enkawlnaah theihtawp chhuahpui turin a ngen bawk.

Chite veng playground lungphum phum tak hi Aizawl Smart City hnuaia project pakhat a ni a, cheng vaibelchhia 8.9 seng a sak zawh tur a ruahman a ni a, 30th June, 2023 a sak zawh hman beisei a ni.

He lungphum phumna program-ah hian Deputy Chief Minister leh Sports and Youth Services Minister bakah UD&PA Department Secretary, Pu Lalmalsawma Pachuau, UD&PA leh Aizawl Smart City hnuaia staff te, Chite veng Local Council aiawhte leh sawm bik mi pawimawhte an tel a ni.