593/2023-2024
Tunlai hian phai atanga sangha (Rohu) lak luhah khawnvartui rim nam a awm thu hmun hrang hrang atangin report dawn a ni a. Food & Drugs Administration, H&FW chuan bawhzui nghalin, a zawrhna hmun hrang hrangah endik hna thawk mek zel a ni.
Sangha hmuh ang angte chu hralh loh tura hren (freezed) an ni a, test turin sample pawh lak zel a ni. Health Department Food Testing Laboratory-ah test-na changtlung zawk kan neih rih loh avangin sangha sample engemaw zat chu Central Food Laboratory, Kolkata-ah thawn a ni.
Sangha zuartute pawh tuna sample thawnte result hriat a nih hma chuan hetiang sangha (Rohu) hi state pawn atanga la lut rih lo tura ngen leh hriattir an ni a. FDA hmuh phak lohva kawl an awm a nih pawhin, mipuite him zawk nan hralh chhuak lo tura ngen an ni.
Khawnvartui rim a nam theih dan hi zau zawka chhui ngai a ni a. State pawn sangha lo kalna lam Food Safety hotute thlenga biak leh hriattir an ni.
Khawnvartui rim nam sangha chu taksa tan a tha lo vang tih a hriat sa a. Rohu bika nam a nih avangin hetiang sangha hi lei loh leh ei insum rih a him ber ang e.
