No.1993/2020-2020  

 
Nimin (12.6.2020) khan Deputy Chief Minister Pu Tawnluia'n Covid-19 hri leng mek dona atan a tul apianga hman turin MLA fund atangin Cheng nuai 25.00 Chief Minister's Relief Fund-ah a chhung lut. Pawisa hi Khawzawl DC kaltlangin cheque hmang-a CM Relief Fund Account-a chhun luh a ni.

Nimin vek khan Delhi atangin Covid-19 avanga tangkhang mi 1 chuan Khawzawl a rawn thlengthar leh a, vawiin lamah DC Rest house atangin khung hran hun hmang zo mi 5 an chhuak thung a. Heti hian tun dinhmun-ah Khawzawl District-ah State dang atanga hrileng vanga rawn haw khunghran mi 196 an awm mek.

Heng khunghran mek te hi Khawzawl town chhunga Quarantine centre 16 leh Isolation centre 1-ah dah an ni a. JNV centre-ah mi 50 awm mek in hmunkhata awm tam berna a ni a, PWD IB ah 1 awm mekin hmunkhata awm tlem berna a ni bawk. Chawh rual-in centre 1 ah mi 12 vel awm mek ang an ni.

Covid-19 avanga khunghran mek te leh kawng hrang hranga anmahni buaipui tute tan nizan khan Khawzawl DC office-a officer leh Staff ten zanriah an buatsaih sak a, eitur hi hmun khat a siam ni in siam zawh veleh Centre hrang hrangah semdarh a ni. Khunghrante hian DC leh Staff chungah leh kawng hrang hranga anmahni buaipuitute chungah lawmthu an sawi a ni

 Mi tlawmngai leh inphalte atangin Khunghrante'n ei leh in tur thilpek an dawn chhunzawm zel a. Tun hnaia thilpek pe tute chu- Chawngtlai VLTF ten Sapthei bag 6, Khawzawl Horticulture Department in Balhla, Riangtlei VLTF ten an-hnah chihrang hrang, Pu C Vanlalena te chhung Dinthar in buhfai bag 1, Vengthar VLTF ten antam leh hmarcha, Pu C Lalhmangaiha te chhung Vengthar in zikhlum leh purunsen, Pi Renghmingthangi'n hatkora tui, Pu Laldengkima te chhung Dinthar in antam, Vengthar UPC (MZ) Kohhran Hmeichhia ten Rs. 1,000.00, Hmuncheng VLTF ten Maian leh antam - te an ni.