498/2023-2024

Aizawl the 19th May 2023: Vawiin khan Common Bio-Medical Waste Treatment Facility lungphum phumna chu Solid Waste Management Centre, Tuirial-ah neih a ni a, Dy. Chief Minister, Pu Tawnluia chu khuallian niin lungphum phumna hi a nei a ni.

Khuallian chuan Aizawl Smart City Limited-hnuaiah hmasawnna ruhrel din leh leh buatsaih mek zel a nih thu sawiin, lungphum a phum tak pawh chu Aizawl Smart City-hnuaia project pawimawh tak pakhat a ni, a ti. Aizawl khawpui chhunga bawlhhlawh sawngbawlna hmun tha tak siam a nih hnuah, damdawiin atanga bawlhhlawhte sawngbawlna tur Bio-Medical Waste Treatment Facility -lungphum phum a ni chu lawmawm a tih thu a tarlang a ni. Damdawiin atanga thli leh bawlhhlawh chi hrang hrangte hian mihring hriselna nasa takin a nghawng thin tih sawiin, project chu zawhfel thuai a nih theih nan contractor- te chu chak zawk leh tha taka hnathawk turin a chah a ni. Bio-Medical Waste Treatment Facility sakna tur hmun petu Tuirial Airfield veng VC, khawtlang hruaitu leh veng mipui te chungah lawmthu a sawi a. Sawrkarin khawpui vawnfai leh tihthianghlim a ngaipawimawh hle tiin, khawpui thianghlim tak nei turin hmalak zel a nih tur thu a tarlang bawk a ni.

Dy. Chief Minister chuan khualzin mi ten Aizawl leh Mizoram khuate chu fai an ti hle a ni, tiin hei hi sawrkar bak ah khawtlang mipui ten tan an lak nasat vang a nih thu a sawi a. A bik takin Aizawl khawpui vawngfai leh enkawl hna thawktu Aizawl Municipal Corporaton (AMC) te hmalakna chu fakawm a tih thu a sawi a. Khawpui fai leh thianghlim chuan khualzin tam zawk a hip thei dawn ni a a hriat thu sawiin Pu Tawnluia chuan Mizoram tan sum lakluhna tha tak a nih theih dawn thu a sawi bawk a ni. Khawpui fai leh chhenfakawm tak ni zel turin mitin in mawhphurna an neih thu tarlangin mipuite faina kawngah tan la thar turin a sawm nghal bawk.

Pu Lalrinenga Sailo, Mayor, AMC, pawhin thu sawiin, Common Bio-Medical Waste Treatment Facility-lungphum phum a ni ta chu ram hmasawnna rahbi pawimawh tak a ni tiin AMC-chu a chhawr tangkai ber tur a ni, a ti. Damdawiin atang a bawlhlawhte chu paihna mumal awm lo a nih avangin AMC-pawhin harsatna tam tak an tawk thin tih a tarlang a, he ‘project’ zawhfel hun an nghahhlelh thu a sawi bawk a ni.

Pu C.C. Lalchhuangkima, CEO, Aizawl Smart City Limited chuan Technical Report pein Common Bio-Medical Waste Treatment Facility sakna tur sum vaibelchhe 7.6 hmuh a ni a, contractor atan M/s BL Engineering, Gujarat leh GI Infotech, Aizawl te chu thlan niin September ni 12, 2020-khan Agreement ziahpui tawh an ni, a ti . Tun dinhmuna phyical progress chu 15% niin project hi June ni 9, 2023-ah zawhfel tur a nih thu a tarlang a. Bio-Medical Waste Treatment Facility- atan hian khawl pawimawh tak tak pathum – Incinerator (bawlhhlawh halna), Shredder (bawlhhlawh thler sawmna) leh Autoclave (medical waste tihthianghlimna) te a awm tur thu sawiin, heng bakah Effluent Treatment Plant (tui tihthianghlimna) a awm tel dawn a ni.

Vawiin Common Bio-Medical Waste Treatment Facility lungphum phumna inkhawm-ah hian Pu Lalmalsawma Pachuau, Secretary (UD&PA) chuan kalkhawmte lawmna thu a sawi a, Pu V. Lalruatliana, Deputy Chief Executive Officer, Aizawl Smart City Limited chuan lawmthu sawiin hun a khar a ni.