497/2023-2024

Aizawl the 19th May, 2023 : Disaster Management & Rehabilitation (DM & R) Department buatsaihin vawiin khan Aijal Club-ah ‘State Level Workshop on New Guidelines and Funding Window of State Disaster Response Fund’ neih a ni a. Hawnna inkhawmah hian Pu Lalchamliana, DM & R Minister chu khuallian niin a hmanpui.

Minister Pu Lalchamliana chuan DM & R Department-in State Disaster Relief Fund (SDRF) zirchianna hun pawimawh tak a buatsaih chu lawmawm a tih thu a sawi a. Sawrkar laipuiin guidelines thar a siam thinte chu zirchiang a, hriatchian a pawimawh hle a ti. DM & R pawisa chu 15th Finance Commission-in a ruahman anga sawrkar laipuiin a pek a ni tiin SDRF ni thin State Disaster Relief Management Fund (SDRMF) tih tak chu mamawh tute tan dik taka hman a nih theih nan thahnemngai taka thawk turin kalkhawmte a chah a ni. District Disaster Management Authority (DDMA), DM & R Directorate leh Secretariat-te thawhhona chu a tha tawk hle nia a hriat thu a sawi a. DDMA-te chu guidelines tharte zirchiang a, midang hrilhhretu ni turin a chah, SDRMF chungchangah awareness a tha tawk lo tiin awmze nei zawka kalpui a nih theih nan tan la turin a hrilh bawk. District level-a khuarel chhiatrupna a thlen changa pawimawh ber chu rang taka report a nih rualin chak taka chhawmdawl hnathawh a ni tiin tanpuina pek thuai tur a ni a ti bawk a, danin a phal chin ang zelin department dangte pawh a tul huna pui thei turin kalkhawmte a chah a ni. Minister chuan chipchiar zawka inzirtirna workshop neih thin chu vawilehkhatah hlawkthlakin lang lo mahse nakin zelah a tangkai hle thin a, chuvangin kalkhawmte chuan hlawkpui theuh turin duhsakna a hlan bawk a ni.

Vawiina ‘State Level Workshop on New Guidelines and Funding Windows of State Disaster Risk Mitigation Fund’ hi Pu Benjamin Lalzama, Director, DM & R chuan a kaihruai a, DM & R Secretary Pi K. Lalrinzuali’n keynote address sawiin, hun buatsaih a nih chhan leh SDRMF hnuaia kaihhruaina hrang hrang zirho turte a tarlang bawk.

Hawnna inkhawm zawh hian technical session neih chhunzawm nghal a ni a. Resource person ten thupui hrang hrang hmangin zirtirna an pe a ni. Technical session-hi Joint Director, DM &R Pi Saizikpuii chuan kaihruaiin Pu Amol Srivastava, Addl. Secretary DM&R hnen tangin thusawi ngaihthlak a ni a. DM & R Superintendent Pu R. Lalropuia chuan ‘Funding Window in SDRF’ tih thupui hmangin zirtirna a pe bawk.

Chawhnu hun chu Deputy Director(A) DM & R Pu K. Lalkroschhunga’n a kaihruai a, Deputy Director (Trg) DM & R Dr. Lalrokima Chenkual chuan ‘Guidelines under SDRF’ sawifiahna neiin Er. Lalbiakzuala, Assistant Director DM & R chuan ‘Reports, Returns and Portals in Disaster Management’ tih thupui hmangin zirtirna a nei bawk. DM & R Director Pu Benjamin Lalzama’n closing remarks pein Dr. Cory Lalbiakzuali, Sr. Consultant, Sendai Framework for DRR chuan lawmthu sawiin hun a khar a ni.

Vawiin workshop-ah hian Mizorama District hrang hrang aiawh DDMA-te bakah Department officials aiawhte an tel a ni.