544/2023-2024

Aizawl, 23rd May 2023: Tukin zing khan Deputy Chief Minister Pu Tawnluia chuan Aizawl Smart City Project hnuaia sak tur pahnih Chaltlang Sports Multipurpose Hall, DIET Complex leh Upgradation of Aizawl Tourism Centre, Tourist Lodge Chaltlang sakna tur lungphum a phum.

Deputy Chief Minister Pu Tawnluia chuan lungphum pahnih puala inkhawm naah thu sawiin Aizawl Smart City Project kaltlanga Chaltlang veng, hmun pahnih-a project lian tak lungphum phum a hna bul tan a ni chu lawmawm a ti a. He project pahnih te tih puitlin a nih theih nan, department hrang hranga, mawhphurh tu te vawi tam tak inhmuhkhawm a nih thu sawiin, department hrang hrangah tawiawmna tha kan nei chu lawmawm a tih thu a sawi a. Deputy Chief Minister chuan Chaltlang veng mipui te pawh lawmpui in, hawn ni te pawh a lo thleng ngei ang a project awmna veng an nih piah lamah Aizawl khawpui leh Zoram pumpui tan-a fuan khawmna leh infiamna hmunpui enkawlna kawngah sawrkar chu an khawtlang hruaitute pawhin tawiawm zel turin leh tangruala, thahnemngai taka thawkho turin a sawm nghal a. Tourist Lodge chu khualzin thlenna piah lamah Aizawl khawpui-a pui pun theihna leh tangkai taka hman theih tura ruahmanna siam belh chu sawrkar ngaih pawimawh a nih thu leh ramin Sports Multipurpose Hall dang thalai te tan a siam sak thei tur chu thalaite tan a lawmawm leh zual a ni a ti a.

Pu Tawnluia chuan project buatsaihna kawngah pawh hun rei tak mamawh a nih thu leh, Covid-19 hripui in min tlak buak avanga hna a chak theiloh thu sawiin mipui te hriatthiampui turin a ngen a. India ramah Smart City Project chu kum 2024 thleng pawh sei a nih thu a sawi a, hemi chhung hian project pahnih hi zawh tum a nih thu a sawi bawk a ni. Project pahnih te hi pawisa awmsa a nih avangin contractor ten hma tha tak leh fel fai taka an zawh theih nan bill chungchangah buaina sawrkar lam atangin a awmloh tur thu tarlangin, a thawktu contractor te pawhin hna uluk taka thawk a, ram tana thahnemngai taka thawk turin duhsakna a hlan bawk a ni. Vengchhung LC leH NGO phungbawm a ngaih chang hunah pawh mit mei a, lo bengvar turin vengchhung mipuite a sawm nghal bawk a ni.

AMC Mayor Pu Lalrinenga Sailo pawhin thu sawiin Indian ram khawpui dang ang bawka kan khawpui a lo mawia, mipui mamawh hrang hrang a lo awm tur chu lawmawm a tih thu a sawi a. Chaltlang mipuite a lawmpui rualin an ta chauh tur nilo tih hria a, Aizawl neitu zawng zawngte tan a ni tih hre reng turin leh duat taka enkawl chhunzawm zel a sorkar nena tang hova awm zelturin a sawmin a ngen bawk a. Mizo fa te ngei thawhna project pahnih vawiin a lungphum a nih chu mizo fa te hi kan thiamna hian ram dang thiamna a el pha a ni tih hria a, hna tha taka thawk turin a chah bawk a ni.

He hunah hian Pu Lalmalsawma Pachuau, Secretary UD&PA chuan kal khawmte lawmna thu tawi a sawi a. Pu C.C. Lalchhuangkima, Chief Executive Officer hnen atangin Technical Report ngaihthlak a ni a. Pu C.Lalpiangthara, Local Council Chairman Chaltlang chuan lawmna thu sawiin he hun hi a ti tawp a ni.

Chaltlang Sports Multipurpose Hall sa tu Contractor hi H.Sanga, Vaivakawn Road, Chanmari, Aizawl a ni a. Rs 13.52 crore senga sak tur a ni a. 15th November, 2022 khan contract agreement siam a ni. He Sports Multipurpose Hall-ah hian Basketball Court, Table Tennis, Boxing Ring, Gym, Parking, Dormitory a awm dawn a. Terrace Level ah hian 4 wheeler parking 10 leh First Floor ah hian 2 wheeler parking 64 leng tura ruahman a ni ang.

Aizawl Tourism Centre Upgradation hi Rs 18.11 crore seng a sak tur a ruahman a ni a, contractor hi M/S Allied Concern, Dawrpui an ni a. 10th February, 2023 khan contract agreement siam a ni a, 9th May 2023 khan hna bul tan a ni a; 30th June, 2024 a sak zawh tura beisei a ni. Ground Floor, Basement I, II, III a awm ang a. Mi 400 leng tur Auditorium chu First Floor-ah siam a ni ang a. Floor tinah Lift well bakah toilet tha tawk tak siamna tur ruahman vek a ni a. Roof plan atan Hybrid Solar panel siam a ni bawk a ni.