1592/2022-2023 

Khawzawl, the 13th August, 2022: Khawzawl  District Child Protection Unit (DCPU) Office, Khawzawl Vengthar a mi chu vawiin chawhma dar 11 khan Deputy Chief Minister Pu Tawnluia chuan hruimawi chepchatin a hawng.

Khuallian Pu Tawnluia chuan Khawzawl District chu District thar zinga DCPO Office nei hmasa ber a ni thei chu lawmawm a tih thu sawiin, a  hlawhtlinna atana thawktu Social Welfare Department Minister leh Department hotute hnenah lawmthu a sawi a. Juvenile Justice Act hmanga naupangte humhimna kengkawhtu tur DCPO Office awm thar chu hmasawnna hlu tak a nih thu sawiin, Office hawn mai duhtawk lo a, a chhawr tangkaitu tur ten an lo hriat theih nan kalphung leh pawimawhnate uar zawka mipuite zirtir turin thawktute a chah a. YMA leh MHIP te chu thawhpuiah a sawm tel bawk.

Deputy Chief Minister chuan nu leh pate hnena harsatna sawi ngam lo leh sawi hreh naupang an awm thin thu leh nu leh pate pawhin an fate enkawl chungchangah harsatna an neih fo thin thu sawiin, nu leh pate inkara awl hnawhkhahna tur chuan DCPO Office hi a pawimawh dawn hle a ni, a ti a. Ram a changkang ang zelin sual pawh a piangchawpin sual hrang hrang a piang ve zel a. Naupangte pawh khawvel changkan dan mil zela uluk taka enkawl an ngai a, nu leh pate pawh fate enkawl lamah kan inzir thar zel a ngai a ni, a ti a. Khawtlang nun leh Kristianna thleng pawha a țha zawnga nghawng nei thei tur, a tha zawnga khawtlang siamthat kawnga hna pawimawh tak thawk thei tur DCPO Office Khawzawl District-in a nei thar chu lawmawm a tih thu sawiin, Khawzawl District mipui zawng zawngten a tangkai thei ang bera an hman theihna turin duhsakna a hlan a ni.  

Thusawitu dang Pu Lalpianfela Chawngthu, Legal Adviser, Mizoram State Commission for Women chuan Khawzawl District chu dan hmanga rorelna Judiciary-ah chuan Champhai bial a la nih thu sawiin, undivided Champhai District chhunga POCSO (mipat hmeichhiat kaihnawih lama kum tlinglote chunga pawikhawihna) thubuai zaa sawmnga chu Khawzawl District atanga lut a ni, a ti a. Hemi bakah hian case tam tak zepa thup bo leh  chhungkuaa insawirem tam tak a la awm a rinawm thu a sawi tel bawk a. Naupangte hi kan hmalam huna nghahfakte an ni a, naupang humsual dai leh tuarte enkawlna bik tur Khawzawl District-in a nei thei chu lawmawm a tih thu a sawi bawk.

He hun hi Pu C.C. Lalchhuangkima, Deputy Commissioner, Khawzawl District chuan a kaihruai a. Pi Lalsiammawii, DCPO, DCPU Khawzawl hnen atangin DCPU Office chungchangte, Child Welfare Committee (CWC) leh Juvenile Justice Board (JJB) case neih dan leh chinfel dante ngaihthlak a ni a. Pi C.Lalhmingsangi, Protection Officer (Institutional Care), District Child Protection Unit, Khawzawl-in lawmthu sawiin hun a khar a ni.

District Child Protection Unit Khawzawl office building hi nikum August, 2021 atang khan mimal in luaha bultan a ni a. Kumin April, 2022 thla atang khan Staff-te hi dah tan a ni a, June thla atang khan pangngai taka office kal a ni. Tun dinhmunah hian thawktu mi 12 an awm mek a ni. 

Khawzawl District Child Protection Unit hnuaiah hian statutory body pahnih; Child Welfare Committee (Naupang venhim ngai leh tanpui ngaite tan) leh Juvenile Justice Board (Naupang dan bawhchhiaa puhte tan) an awm a. An ni hi September ni 16, 2021 atangin kalpui tan a ni a. CWC leh JJB member-te hi mimala thuneihna pek an ni lova, naupang case ngaihtuaha an thutkhawm lai erawh chuan First Class Magistrate power pek an ni.

CWC ah hian Chairperson leh Member mi pali an awm a, kar khatah vawihnih thutkhawm an nei thin a, mumal taka kalpui a nih atanga vawiin ni thlengin CWC ah hian case 30 ziahluh tawh niin, chung zinga case 28 te chu chinfel tawh a ni a, heng zingah hian POCSO case hi tam berin case pawh pariat (8) lai a awm tawh a ni.

JJB ah hian Principal Magistrate Judicial First Class Magistrate leh Member pahnih an awm a, thla khatah vawihnih thutkhawm an nei thin a. Mumal taka kalpui a nih atanga vawiin ni thlengin case 5 ziahluh tawh niin, case pahnih chinfel tawh a ni a, heng zingah hian rukruk case tam berin case pathum (3) an nei tawh bawk a ni.