1593/2022-2023 

Khawzawl, the 13th August, 2022: Khawzawl District Hospital-a Blood Storage Centre bunfel chu vawiin chawhnu dar 1:00 khan Deputy Chief Minister Pu Tawnluia, Tuichang AC bialtu chuan hruimawi chepchatin a hawng.

Khuallian Pu Tawnluia chuan thisen dah khawlna Khawzawl District-in a nei ta chu lawmawm a tih thu a sawi a. Hemi atana sum thawhtu company pathumte, Khawzawl DC, CMO leh a hlawhtlinna atana official hah taka thawk zawng zawngte chungah lawmthu a sawi a. Khawzawla Blood Storage Centre awm ta chuan mipuite a tih thlamuan phah hle dawn thu sawiin, thisen la tura Champhai pan dawn chuan darkar khat chuang kal a ngai thin a, tunah erawh chuan thisen vawnthatna Khawzawlin a lo nei ta a, Khawzawl mipuite tan malsawmna nasa tak a nih thu a tarlang bawk.

Dy. CM chuan Mizoram sawrkarin mipuite  hrisel zawk nan ke a pen zel thu leh inenkawlna hmunhmate a theih ang anga a thuam that zel thu sawiin, State sawrkar sum mai chuan thiltih zung zung a harsat thin avangin a țul angin sum dap thin a ni a. Muangchanga kal bek bek a ngaihna chin a awm thin a ni, a ti a. Khawzawl District Hospital pawhin a tahtawlin hma a sawn zel dawn a ni, a ti bawk. Pathianin thiamna a pek Doctor-te chu Pathian kaihhruaina dil chunga mipuite rawngbawl chhunzawm zel turin a chah a. Blood Storage Centre chu Khawzawl mipuiten tangkai taka an hman theih nan duhsakna a hlan a ni.

Khawzawl District Hospital Blood Storage Centre hawnna inkhawm hi Bawrhsap Pu C.C. Lalchhuangkima chuan a kaihruai a. Dr. Albert Lalhminghlua, CMO hnen atangin technical report ngaihthlak niin, Blood Storage Centre-ah hian thisen 350 ml, bag 160 bawr vel a leng thei dawn a. Medical Officer leh Lab technician 1 ve ve an duty dawn a ni. 

Khawzawl District Hospital Blood Storage Centre sakna tur hi Deputy CM hmalaknain  company pathum CSR fund atanga dawn a ni a. Anusha Projects Private Limited, Shri Balaji Construction Company leh Dhariwal Buildtech Limited te atangin cheng nuai 5 theuh dawn a ni a. CSR fund atang hian building thawmthat, Solar inverter dah, ECG, Semi Auto Analyser leh tul dangte lei a ni a. Champhai atangin Food and Drugs Asst. Inspector-in phalna țul angte buaipuiin DC kaihhruaina hnuaiah a hlawhtlin theih nan ngun taka vil a ni.