1594/2022-2023 

Champhai, the 13th August, 2022: India ram zalenna ni, August ni 15 a Chhangphut Field, Champhaia lawm tur inpuahchahna kalpui chu vawiin khan hmawrbawk fel a ni. Vawiin chawhnu khan khuallian ni a Independence Day lawmna hmanpui tura Sawrkarin a ruat School Education Minister Pu Lalchhandama Ralte chuan tluang takin Champhai a lo thleng fel a. Champhai chu India ram zalenna ni hmang turin a inpeih fel a ni.

Parade contingent-te inpuahchahna hnunhnung final rehearsal chu nimin khan Chhangphut Field-ah neih zawh fel niin, vawiin lamah a lawmna tur hmun Chhangphut Field hmunhma cheibawl leh buatsaih chu zawh fel a ni bawk a. Independence Day Champhai-a hmanna rawn telpui tura Sawrkarin a ruat School Education Minister Pu Lalchhandama Ralte leh a mah rawn tawiawmtu MLA pahnih; Health & Family Welfare Board Vice Chairman Dr. ZR Thiamsanga leh Rubber & Allied Crops Board Vice Chairman Pu Lalrinsanga Ralte te chuan vawiin chawhnu khan Champhai rawn thlengin Circuit House kawtah DC Pu James Lalrinchhana, SP Pu Lalrinpuia Varte, Official leh khawtlang hruaituten an lo hmuak a ni.

Kar thar Thawhtanni chawhma dar 10 hian India ram zalenna ni, Independence Day chu ropui takin Chhangphut Field-ah lawm tum a ni a. Kumin Independence Day lawmnaah hian parade contingent 18; Armed contingent 1, Unarmed Contingent 7 leh School Contingent 10 an awm thei dawn a. District Level Independence Day Celebration Committee chuan ropui taka Independence Day lawm a nih theih nan mahni chanvo theuh hneh taka hlen turin mawhphurhna latu zawng zawngte a ngen a, Independence Day chu India ram ni pawimawh bik a nih avangin sawrkar hnathawk, zirlai leh khawtlang mipuite chu he hun hi ngaipawimawha tel vek turin a sawm a ni.

Hetih mek lai hian India zalenna champha vawi 75-na lawmna atana in tina hnam puanzar zar zar runpui, 'Har Ghar Tiranga', vawiin August ni 13-15 chhunga kalpui chuan mipuite thlawp a hlawh hle a, chenna inahte hnam puanzar hi zar niin, District Administration chuan hnam puanzar la zar lo te pawh he ni puala zar tur hian a sawm a. August ni 13-15 chhung hian sawrkar pisa leh hmun dangte bakah zirna in, mimal building leh mimal in tinahte tar vek turin Sawrkar chuan District mipuite a ngen a ni.

Sawrkar laipuiin India zalenna champha vawi 75-na lawmna Azadi ka Amrit Mahotsav (AKAM) chi khat atan a duh apiangin India hnam puanzar an zar theih na turin Indian flag code rules chu August ni 13-15 chhung atan a siam danglam a, mimal in-ah pawh zar theih a ni a. Ni tlak ruala hnam puanzar lak thlak thin pawh lakthlak ngai lovin, chhun leh zanah hnam puanzar chu zar reng theih a ni ang.