1656/2022-2023 

Aizawl, 19^th August, 2022 : Sialhawk khua in an thar chhuah lakhuihthei (pineapple) kilogram 230 chu Dubai, United Arab Emirates (UAE) a hralh turin Deputy Chief Minister Pu Tawnluia’n tukin dar 7:00 khan Horticulture Directorate kawtah a vai liam.

Hemi puala inkhawm tawi buatsaihah khuallian Pu Tawnluia chuan Sialhawk khua-a lakhuihthei chingtute hlawhtlinna a taka hmuh theiha a awm ta hi an taimakna leh tumruhna bakah khawtlang an tanrualna rah a ni, a ti a. A bial chhunga kuthnathawktute hnenah hralh chhuah tham an thar chhuah phawt chuan a hralhna tur an hmuh ngei ngei nan theihtawp a chhuah ang ti a chona a siam thu sawiin, Tualte tomato Assam lamah hralh chhuah a ni tawh a, Sialhawk lakhuihthei pawh Assam leh Meghalaya a hralh a nih bakah India ram pawn Dubai (UAE) ah hralh a ni dawn ta a, Doha (Qatar) leh Bahrain ah pawh thawn chhuak turin kan inbuatsaih mek bawk a ni, a ti a. Thlai leh theirahte a hlawma chin (cluster approach) a bial chhungah an kalpui thin chu a lawmawm a ti a, lakhuihthei pawh Sialhawk mai bakah a chhehvel khua ten an ching a, a hlawma chin hian a hralhna tur zawn kawngah leh Department lam atanga vil kawngahte, thil dang dangah a tangkai bik hle a ni, a ti a. Lakhuihthei huan lirtheiin a la pawh lohte chu lai tlang turin hma lak a nih zel tur thu a sawi bawk.

Horticulture Development Board Vice-Chairman Prof. F. Lalnunmawia pawhin Sialhawk khua in an taimakna leh thawhrimna rah an seng chu a lawmpui thu a sawi a, Mizoram tana hun chhinchhiahtlak leh mellung pawimawh tak a ni tih sawiin lakhuihthei India ram pawna hralh chhuak tura ngaihtuahna senga hma latute zawng zawng chungah lawmthu a sawi a ni.

Horticulture Department Secretary Pu K. Lalthawmmawia chuan tun tuma Sialhawk lakhuihthei Dubaia thawn chhuah hi a enchhinna a nih avangin a tam thamin thawn chhuah a la ni rih lo a ti a. Dawr chhunzawm tlak zel ni turin tan mar a ngai a, a nihna leh a that dan (quality) hloh lo tura tan lak a tul tih sawiin, tun tuma an hralhna rate kg khat Rs. 30/- chu a phurhna nen chhutin a hniam kan ti maithei a, a bul tanna tur a nih vangin hloh huamin hma lak phawt a ni, a ti.

Sialhawk khua hian kum 2002 atang khan lakhuihthei hi an ching a, a chhehvel khua Chalrang leh New Chalrang pawhin an ching chhunzawm ve a ni. Sialhawk khuaah hian kum kal ta khan chhungkaw 320 in lakhuihthei huan an nei a, an thar chhuah hi quintal 6400 niin Rs 95,00,000/- vel an lei chhuak a ni. Kuminah hian a lo berah quintal 10,000 vel thar chhuah an inbeisei a ni.

Sialhawk khuain lakhuihthei an chinna kawngah hian Horticulture Department chuan theihtawp a chhuah pui a, training vawi tam tak a pek bakah INM leh IPM hnuai atangin an mamawh damdawi leh leitha te pek an ni bawk. An tharchhuah te awlsam zawka an phurh chhuah nan kum 2018 khan boulder soling kawngpui Km 6 zel, Rs 9,00.000/- zet sengin a lo laih sak tawh bawk a, an tharchhuah zawrhna turin Rural Market shed te siamsakin an thlai thar hralhna tur theihtawpin a ngaihtuah pui bawk thin.

Zau zawka an tharchhuah te hralhna tur ngaihtuah zel a niin, Dubai lama thawnchhuah turin ruahmanna siam fel a ni a. Fair Exports (I) Pvt. Ltd. (A Division of Lulu Group International) te nen in biakremna neiin, anni hian Mumbai Airport-ah Kg-ah Rs 30/- hisap in an lo leisak dawn a, thlawhtheihna a inthawn turin ruahmanna siam a ni a, engkim peihfel a ni tawh a ni. Ruahman sa ang chuan Dubai-ah Kg 900 thawn leh tur a ni a, Doha, Qatar leh Bahrain-ah Kg 740 ve ve pek chhin phawt tum a ni bawk.

Sialhawk Village Council Vice-President Pu J. Rampanmawia chuan zirchianna an neih tawhah Mizoram chhunga lakhuihtheim tharchhuah zawng zawng zinga 60% hi Sialhawk khaw tharchhuaha nih thu sawiin, lakhuihthei an enkawlna ah hian di hlo an hman loh thu leh organic a nih thu a sawi bawk a ni.