Tukin Dar 6:30AM khan Deputy Chief Minister Pu Tawnluia chu Fit India Run Mizoram hmannaah khuallian niin, A.R Ground, Lammual ah hawnna hun a hmang nghal a ni. Fit India Run Mizoram hi Sports & Youth Services Department Secretary Pu H.Lalengmawia, IAS chuan kaihhruaina hun a hmang a ni.

Deputy Chief Minister leh Khuallian ni bawk Pu Tawnluia chuan India rampum huapa programme duan Fit India Movement hawnna hun Mizoram sawrkarin a buatsaih chu  lawm awm, a ti a. Fit India Movement Programme pawimawh tak  National Sports Day a hman a ni pawh chu lawm awm a ti bawk a, Sports & Youth Services Department kaltlangin Fit India Movement hi Mizoram-ah kalpui a ni anga, vawiin ni hi a bul tanna a ni, a ti a. Fit India in a tum bulpui ber chu taksa, rilru hrisel leh fit tha, ei leh in thianghlim, nunphung hrisel leh uluk neih hi rampum hmasawnnan a pawimawh a ni, tih hi a ni a ti a.  Khuallian chuan taksa insawizawi uar zawka kalpui leh hriselna kaihhnawih kawngah he Movement hian hma a la dawn a ni, tiin a sawi. Zirna In hrang hrangah hmalak hmasak ber a ni ang a, sports lama talent neite haichhuah pahin ram pumin hriselna lam hawiin tan a la dawn a ni, tiin a sawi. Khuallian Pu Tawnluia chuan thalai tam tak zuk leh hmuam leh ruihhlo bawi a tlan turte, nunkawng diklo zawh turte chhanchhuah nan he Movement hian hma a la dawn a ni, a ti bawk a. Fit India Mizoram hlawhtlinna turin zirlai leh mipuite thawpuiah a sawma, a mawhphurtu Department pawh duhsakna a hlan bawk a ni.

Sports & Youth Services Minister Pu Robert Romawia Royte pawhin thu sawiin, Fit India Movement chuan mitinin taksa tih fit kawngah hmalaa, nitin hun inpe turin a beisei a ni, a ti a. Mizoram sawrkar chuan  Fit Mizoram Movement March Ni 22, 2019 khan a
tan tawh a, rampum huap Fit India Movement nen pawh tum inang niin, taksa hrisel, rilru hrisel neiturin leh mizo hnam te hi India rama fit ber ni tura tanla zel turin mipuite a chah bawk a ni.

Mizoram Chief Secretary Pu Lalnunmawia Chuaungo chuan Zirlai, Bharat Scouts & Guides, Sports Association hrang hrang kalkhawm mi 1750 hnenah  Fit India Movement thuthiam a chham tir a. Fit India Run Mizoram bul tan nan kalkhawmte hian AR Ground, Lammual vawi hnih tlanin an hel a. Sports Association 32 zinga member kal hnem ber Taekwondo  Association hnenah Rs 5000 lawmman pek a ni.

He hunah hian Deputy Chief Whip Pu Lalrintluanga Sailo leh East Tuipui Bualtu MLA Pu Ramthanmawia  leh midangte an tel a ni.

Vawiin Dar 10:00AM khan rampum huapin Prime Minister Pu Narendra Modi chuan Indira Gandhi Stadium- Complex,New Delhi-ah  Fit India Movement hi a hawng a.  Tun kum thupui a tan hian 'Physical Health and Mental Well Being' tih thlan a ni a, kumtin atan thupui hrang hrang thlan lawk a ni a; Kum 2020 atan 'Healthy Food and Eating Habit', Kum 2021 atan 'Sustainable and Friendly Lifestyle', Kum 2022 atan 'Healthy Life Practices' tihte thlan lawk a ni. India ram pumah Fit India Movement hi nasa taka kalpui tum a ni a, Joint Secretary, GOI hnuaiah pisa te pawh din tura hmalak a ni. Fit India Run Mizoram hi Fit India Movement denchhena duan a ni.

Attachment

  • Loading attachment...