1016/2023-2024

Aizawl, the 3rd July 2023: Aizawl Smart City Limited hnuaia din Integrated Command & Control Centre (ICCC), a taka hman tanna, go-live hun chu vawiin khan Treasury Square-a ICCC pisa ah neih a ni a. Deputy Chief Minister Pu Tawnluia, UD & PA Minister ni bawk chuan khuallian niin a hmanpui.

Vawiina ICCC go-live programme-ah hian Deputy Chief Minister chuan Aizawl Smart City hnuaia project nghahhlelawm tak, a taka hman theih tura peihfel a ni ta chu lawmawm a tih thu a sawi a. A puitlinna kawnga thawktute chu fakin an inpekna chu chhuanawm a tih thu a sawi.

Smart City Mission chungchang sawiin Deputy Chief Minister chuan kum-8 kal ta atang khan India ram puma khawpui 100 thlan chhuahah kalpui a nih thu a tarlang a. Khawpui tih changtlun leh tihchangkan chu he mission tüm ber a ni a ti. Smart City hnuaia khawpui thlan chhuah zinga tel tur chuan tehfung hrang hrang a awm tiin Mizoram pawh kum 2018 khan pawm a nih thu a tarlang. Covid hripuiin kum-2 chhung a thutchilh avangin hmalaknate duh angin chak lovin thuanawp deuh mahse theihtawp a chakin an kal mek a ti a, Aizawl khawpui thuam mawi a tih changkan nan tun dinhmunah project-30 chuang kalpui mek a ni a ti. Smart City hnuaia hmalaknate chu kum-5 chhunga zawh fel tur tih a nih laiin Covid avangin kum-1 dang pawhsei a ni tiin nakkuma zawh fel hman tumin nasa takin an kalpui mek a ni a ti bawk.

Smart City chuan hmasawnna changkang leh tluantling, mipuite chhawr tangkai tur ni bawk chu an thupui ber a ni a ti a. Thalaite hriselna leh intihhlimna tur ngaipawimawhin facilities hrang hrang siam a nih thu tarlang bawkin mipui vantlang hawi harhna turte pawh ruahman a nih thu a sawi bawk.

Pu Tawnluia chuan a taka hman theih tura vawiina hawn tak ICCC chu Zoram mipuite tan a tangkai dawn hle a ti a, a bikin information pawimawh hriat zung zung theihna a nih bakah, misual hnuchhuina leh traffic dan kenkawh kawngah a tangkai dawn hle a ti a. khawpui dang atanga Aizawl a rawn zin te pawn an duh zawng information an neih zung zung theihna tur a ni tiin hmasawnna changkang tak a ni a ti a, a tangkaina a thuahhnih dawn thu a sawi bawk.

He hunah hian UD & PA Secretary Pu Lalmalsawma Pachuau chuan lawmna thu a sawi a. Aizawl Smart City Limited CEO Pu CC Lalchhuangkima'n technical report pein, Aizawl Smart City Limited Deputy CEO Pu V Lalruatliana chuan lawmthu sawiin hun a khar a ni.

Integrated Command & Control Centre, vawiin atanga hman tan tak hi project cost chu cheng vaibelchhe 117.98 a ni a. March Ni 7, 2020 khan contract agreement ziah a ni. ICCC-ah hian control room, conference room, reception area, operator room leh data centre changkang leh changtlung tak te a awm a. Vantlang mipui tana a thlawna hman theih tur wifi hmun 15 ah bun a ni a. Surveillance camera hmun 76 ah bun niin Fixed Camera 236 bakah Pan Tilt Zoom (PTZ) 39 a awm bawk. Khawpui kawtchhuah pawimawh hmun 14-ah Automatic Number Plate Recognition (ANPR) Camera dah niin, Facial Recognition System khawpui chhung hmun pawimawh 5-ah leh khawpui chhung hmun 4-ah Environmental Sensor dah a ni bawk. Bawlhhlawh paih motor 140-te monitor-na tur GPS hmang Solid Waste Management Application Dashboard bakah Aizawl khawchhung chanchin hriat zung zung theihna Variable Messaging Display' hmun 4-ah dah a ni. ICCC hi kum 5 chhung MSI & SI hian enkawl zui hna an thawk dawn a ni.