1015/2023-2024

Aizawl, 3rd July 2023: Vawiin khan Urban Development & Poverty Alleviation (UD&PA) Department leh State Mission Directorate, Swachh Bharat 2.0 te buatsaihin MINECO Junction-ah Deputy CM Pu Tawnluia hovin ‘International Plastic Bag Free Day’ hman a ni a. Hemi rual hian hmankhat daih plastic hmang tawh lo tura inzirtirna beihpui ‘Ban on Single Use Plastic Drive’ hawnna hun a hmanpui nghal a. Chief Secretary Dr. Renu Sharma chuan khualzahawm niin a hmanpui bawk a ni.

UD&PA Department changtu Deputy CM Pu Tawnluia chuan thu sawiin UD&PA chuan khawpui enkawltu Department a nihna angin changkanna leh hmasawnna a awm zel theih nan faina leh thianghlimna kawngah theihtawp a chhuah mek zel a ni, a ti a. Mihring ten nitina bawlhhlawh an tihchhuah senghawi, a paihna hmun bik a paih, sawngbawl, hman nawn theih leh lei thaa siam theih te thliarfel chu Central leh Mizoram State Pollution Control Board (CPCB) te nen thawkdunin hma nasa taka an lak tawh thu a tarlang a. District tinah Solid Waste Management Center din vek tum a nih thu sawiin AMRUT 2.0 hnuaiah pawh faina kawnga hmasawnna thlen tum a ni, a ti. ‘Hman khat daih sarang’ titawp turin kum 2021 atangin sawrkarin hma a lak tawh thu khuallian chuan a sawi a. State level-ah committee din niin, District tinah Deputy Commissioner (DC) te kaihhruaina leh Aizawl District bikah Joint Municipal Commissioner kaihhruaina hnuaiah committee din a nih thu a tarlang a. Heng committee-te hnuaiah hian ‘Hman khat daih Sarang’ titawp turin Inspection Team din a nih thu leh bazar leh dawr hmun te an fan thin thu Deputy CM hian a sawi a ni.

Pu Tawnluia chuan ‘Hman khat daih sarang’ titawp turin mipui thawhpuina sawrkarin a mamawh tak zet a ni, a ti a. Bawlhhlawh a bawma paih leh thianghlimna chungchang inzirtirna chu chhungkuaah bultan a pawimawh a; thalai lungfing leh zuanzang zawk te chuan faina leh ‘hmankhat daih sarang’ tihtawp kawngah nu leh pa te an kaihhruai a tul a ni, a ti. He lam kawnga sawrkar hmalakna ten rah tha a chhuah zel chu lawmawm a tih thu sawiin Deputy CM chuan mitin tanrualna tel lo chuan heng beihpui te hi a hlawhtling thei lo a ni tih hre reng turin kalkhawmte chu a chah bawk a ni.

Khualzahawm Dr. Renu Sharma pawhin thu sawiin ‘Hman khat daih sarang’ khapna thupek chu November ni 5, 2021 atanga kalpui tan a nih tawh thu a sawi a. Central Pollution Control Board-in kaihhruaina a siam zulzuiin Mizoram UD&PA Department chuan hmankhat daih sarang titawp turin ‘Action Plan’ a siam thu a tarlang a. Mizoram sawrkar thiltih reng rengah hman ‘Hmankhat daih sarang’ hman loh hram tum a nih thin a nih thu te, sawrkar pisa tam takin ‘Hman khat daih sarang’ hmang lo tura an intiam tawh thu te a sawi bawk a ni.

He hunah hian Mizoram Pollution Control Board Member-Secretary Pu C. Lalduhawma chuan ‘keynote address’ a pe a. India rama ‘Hmankhat daih sarang’ titawp tura hmalakna hrang hrang te sawiin, sarang tawih thei lo te hian khawvel a tihbuai avangin titawp tura thapui thawh a ngai takzet a ni, a ti.

Vawiin inkhawmah hian tunhnaia ‘Cleanliness Trekking Expedition’ neia Lailapur atanga Khaikhy (Siaha District) thleng kea kilometer 623 zet kal Pu Vanlallawmzuala Varte chawimawina hun hman a ni a. Swachh Bharat Mission (Urban) 2.0 Ngopa Local Ambassador Pu H. Zoramhruaia pawhin hun a hmang bawk.

International Plastic Bag Free Day puala inkhawm neih hi UD&PA Secretary Pu Lalmalsawma Pachuau chuan kaihruaiin inlawmna thu a sawi a. UD&PA Joint Director Pu Malsawmzuala hovin ‘Hman khat daih sarang’ hmang lo tura intiamna hun hman a ni a; UD&PA Director Pu H.Lianzela chuan lawmthu sawiin inkhawm hi a khar a ni.