1014/2023-2024

July ni 1, 2023 Inrinni khan kan rama awm lo (exotic species) sava nunglai 8 lai phurtu F. Lalchhuanawma s/o F. Laltanpuia, Melbuk School Veng, Champhai District ami chu a car Hyundai (Venue) Registration No. MZ 04A 5716 nen Seling YMA CADS (Central anti-Drugs Squad) duty-te tanpuinaa man a ni a. Pu Vanlalpeka, R.O. Seling chuan District Court, Aizawl-ah a thlen nghal a, Pu H.T. Lalmawizuala, Judicial Magistrate, 1st Class, Aizawl thupek angin heng savate hi Aizawl Zoo-ah dah a ni a, a phurtu F. Lalchhuanawma, Melbuk hi Central Jail-ah dah luh nghal a nih bakah, a phurhna motor car pawh hrênsak a ni bawk.

July ni 14-ah a chungchang ngaihtuah leh tura Court hmaa inlan leh tur a ni ang.

Tun tuma dan phal loh nungcha man hi Wildlife (Protection) Amendment Act, 2022 Mizoram-a hman a nih hnua Case awm hmasa ber a ni. He Wildlife (Protection) Amendment Act, 2022 dan hi a khirhin a bawhchhetu tan hremna a nat êm avangin mi tinte he dan bawhchhe lo tur hian EF&CC Department chuan a ngen a ni.