2277/2022-2023
Khawzawl, the 11th October, 2022: Khawhai khuain Mizoram Cleanliness Competition-2021 kaltlanga faina kawnga hmasawn chak ber Fastest Mover Award lawmman an dawn chu vawiin khan Khawhai Town Hall-ah Khawhai Village Council buatsaihin lawm a ni a. He hun hi Deputy Chief Minister Pu Tawnluia, UD&PA Department changtu Minister leh Tuichang bialtu MLA ni bawk chuan khuallian niin a hmanpui a, faina intihsiakna a hmasawn chak ber lawmman Khawhaiin a lak lawmpuinan Buhkangkawna public toilet tha tawk tak siamna tur pawisafai Khawhai VC te a hlan a ni.

Pu Rohmingmawia, Khawhai VC Vice President kaihhruaiah hian Pu Tawnluia chuan Khawhai khawtlangin an lo dawnsawn danah lawmthu sawiin, Khawhai Dil, tlang leh Historical site-te chu zoram thalaite intihhlimna leh khualzinte fuankhawmna tura cheitlak a nih avangin chutiang tura tuaihnuma chei tum a ni, a ti a. Khawhai leh Lungtan tui tlan tur Phaisen lui chu nizung tha chakna hmangin pump chhuah tum a nih thu tarlangin, tunah hian hnathawh mek a ni a, nakumah chuan hman theiha zawh hman tum a ni, a ti a. Khawhai-ah field tur kan zawng thin a, tunah Pawih Veng Field kan tih mai thin chu NHIDCL in CSR hmangin an lai tan mek a, tun thal chhoah chuan a hmunhma laih tur hi an zawh hman kan beisei a, an zawh hunah chuan phullem phah ngei kan tum dawn a ni, a ti bawk.

Deputy CM chuan Covid-19 hrileng avanga haratna tawhte tarlangin, hrilengin khawvel pum a tuam a, Mizoram pawh kan bang bik lo a, kum hnih chhungin sum leh pai pawh hemi atan hian tam tak hman a ngai a, hemi avang hian kan hnathawh mekah harsatna kan tawk a, chuti chung chuan Chief Minister leh Minister dangten central hotute dawrin theihtawp an chhuah reng a ni, a ti a. Sawrkar flagship programme SEDP pawh first installment chhungkaw 60000 hnenah kan sem mek a, kan la sem zel dawn a ni, a ti bawk a. SEDP hi kawng hrang hrangin kan hmang tangkai a, Zirtirtu indaihlohna khuaah SEDP teacher kan dah a, Health Worker nei lo khuaah SEDP hmangin Health Worker leh Helper nen kan pe mek a, mipui chawikan zel hi sawrkar tum a ni, a ti a. Mipuite chu intodelhna leh hmasawnna atana sawrkar hmalaknate chu tawiawm zel turin a sawm a ni.

Tuichang bialtu MLA ni bawk chuan a bial chhung Biate khuain fai lawmman azawna kum 5 an lak lawmna naktuka neih a nih tur thu pawh sawiin, Khawzawl District khua ten faina kawnga hma an sawnna leh an nihna te chu a ropui takzet a ni, a ti a. Pu Tawnluia chuan Khawhai Town Hall-a Sound System tur YMA hotute duhdan ang lei a nih tur thu a sawi a. Khawhai PHC-a X-Ray technician tur sawrkarin a pek dawn thu a sawi bawk.

Khuallian hian Kum 2022 chhunga Khawhai khaw chhunga fai intihsiak result puanna a nei a, lawmman semna neih zui a ni a. Khawhai Venglai chu veng fai bera thlan niin, Restaurant/hotel fai berah Peter Restaurant thlan a ni a, Anganwadi Centre fai berah Centre No. IV thlan a ni a, School fai berah St. Arnold's School thlan a ni a, Office fai berah Khawhai PHC thlan a ni.

Pu H.Lianzela, Director, UD&PA pawhin thu sawiin Khawhai khuain Fastest Mover Award a dawng thei chu a lawmpui thu a sawi a. Kum 2020 kuma Mizoram khawpui 23 awmah Khawhai khua chu 23 na niin, kum 2021 ah 7-na dinhmuna an inhlankai dawrh avangin Fastest Mover Award hlan an ni, a ti a. Mizoram khawpuite pawnlera inthiar awm lohna ODF a puan vek tawh anih thu tarlangin, Khawhai khua pawh faina kawnga tan la zel turin a chah a. Pu H.Lianzela hian Khawhai khuaa hman tur hnawmbawm 4 Village Council te a pe a ni.

District Bawrhsap Pu C.C. Lalchhuangkima chuan Khawhai Sanitation Task Force hmalaknaah lawmthu a sawi a. Kum 2022 atan endikna kalpui mek a nih thu sawiin, tun aia hmasawn zel turin kalkhawm mipuite a sawm a. Bazar tihfai leh tuiluankawr tihfai kawngah tan la thar turin Khawhai mipuite a chah a. Bialtu MLA thahnemngaihnain Khawhaiah Sapthei leh Tomato chin leh tur a nih thu sawiin, theihtawpa tan la thar zel turin a chah a ni.

Programme tan hma hian Pu Tawnluia chuan Khawhai khuaa hmasawnna hnathawh hrang hrangte a hmunah kalin a tlawh bawk a ni.