2278/2022-2023

Champhai, the 11th October, 2022: Vawiin khan Champhai Winery Complex, Tlangsama loneitute grape thar chhuah chhunkhawmna hmun tur, Collection Centre sak chu Dr. Elizabeth Saipari, Horticulture Department Director chuan a hawng.

Collection Centre hawnna puala inkhawm tawi buatsaihah thusawiin Dr. Elizabeth Saipari chuan, khawchhak tlangdunga loneituten grape an chin tan hnuah Horticulture Department nena tangkawpin a chindan tha zawkte, a sawngbawl dan tur leh a sawngbawlna hmun tha zawkte zawng chawpin Winery din chhoh a ni, a ti a. Hemi kawnga sulsutute fakawm tiin, a hlawhtlinna chu department khata awm Horticulture Department leh loneitute an ni, tih a sawi bawk.

Collection Centre hawn tak chu NABARD hnuaia scheme hmanga din anih thu sawiin, mahni huanah sawrkar atanga tanpuina hlep tum an awm thin laia Champhai Grape Growers  Society-in a tha ber duh avanga sum an thawh belh chu entawntlak a tih thu a sawi a. Grape chingtuten harsatna an tawhin department-in  hreawm a tihpui thin thu leh, an hlawhtlinna chu department lawmna thlentu a nih thu a sawi a. Tun hnaia Kohhran inkhawmpui thenkhata Sacramental Wine atana Mizorama grape thar chhuah atanga siam hman ve tawh nise tia rel a ni chu lawmawm a tih thu sawiin, Sacramental wine chu a hranpa taka siam wine pangngai nena inang lo, a nih dan puanzar tula a hriat thu a sawi tel bawk.

Collection Centre hawn tak hi a sak nan Rs. 63,25,818 hmanral a ni a, Horticulture department atangin Rs. 29,70,741 hmuh a ni a, a bak zawng Rs. 33,55,077 chu Champhai Grape Growers Society ten an tum a ni.  Collection Centre hi kum 2019 atang khan sak tan niin, chhawng 3 a sak a ni a, a zau zawng hi square feet 3838 niin, a tira ruahman aiin feet 1380 bialin an sa zau zawk a ni. Grape chhunkhawmnaah hian grape metric ton 400 vel leng tura ngaih niin hemi bakah hian manager office, staff office leh meeting room-te a awm nghal a ni.

He hun hi Pu HS Vanlalfakzuala, Chairman, Champhai Grape Growers Society chuan a kaihruai a. Pu Lalduhawma, Factory Manager-in technical report a pe a. Pu C.Zohmingliana, General Secretary, Champhai Grape Growers Society-in lawmthu sawiin hun a khar a ni.