2044/2023-2024

Khawzawl, 28th September 2023: Vawiin khan Deputy Chief Minister Pu Tawnluia, Tuichang AC Bialtu MLA ni bawk chuan Khawhai a tlawh a. Khawhai Town Hall-ah Khawhai VC buatsaihin Deputy CM lawmna programme hman a ni.

He hunah hian  Pu Tawnluia chuan Khawhai mipuite hnen atanga duhsakna  leh tawiawmna nasa tak a dawng thin chu a lawm thu a sawi a. Hripui leng vangin sawrkarin sum harsatna a tawk a,  hnathawhna hun tam tak hloh bawk mah se hmasawnna hna thahnemngai takin a thawk mek zel a ni, a ti. Deputy Chief Minister hian Khawhai leh Lungtan khua te tan Sakeilui tui la tura hma lak mek a nih thu tarlangin, kumin chhung ngeia zawh hman beisei a nih thu a sawi a. Mizoram sawrkar chuan zirna chawikan a ngaihpawimawh thu pawh Deputy CM hian sawiin;  nimin lama Cabinet thutkhawmah school engemawzat te chu dinhmun tha zawkah sawrkarin a hlang kai tih a tarlang a, heng zingah hian Khawhai HSS pawh Lumpsum atangin Adhoc Grant in Aid a hlankai zingah a tel chu lawmawm a tih thu a sawi bawk a ni.

Inkhawm hi Khawhai VCP Pu Daksiamliana chuan a kaihruai a, VC Secretary Pu PC Lalsangzuala’n inlawmna thu a sawi. Vawiin vek hian Deputy CM hian Chalrang leh New Chalrang a tlawh ang a, Vangtlang Water Supply Scheme leh Community Hall a hawng dawn bawk a ni.