2043/2023-2024

Mamit Dt. 28th September, 2023 : Nimin khan Tuipuibari Secondary Samagra Shiksa School thar lawmna leh Foundation Stone phumna Er. H. Lalzirliana, MLA Mamit Constituency chuan khuallian niin a hmanpui a. Pu Laldingliana District Eduction Officer (DEO) pawhin he hun hi a hmanpui bawk a ni.

Khuallian Er. H. Lalzirliana chuan thu sawiin Tuipuibari khua-in zirna School tha tak Secondary School an nei ta chu thinlung taka a lawmpui thu a sawi a, a hlawhtlin theih nan hian District Education Officer te nen theihtawp an chhuah thu a sawi.

Khuallian chuan Tuipuibari ruam hmasawnna tur hian theihtawpchhuahin nasa taka ngaihtuahna hman a nih thu a sawi a, mipuite'n kan mamawh em em Mizoram Rural Bank, High School Leaving Certificate Exam Centre-te neih thar a ni ta a, kawng lamah pawh nasa takin hmasawnna hmuh a ni a, Health lamah pawh khaw hrang hrangah Health Clinic neih a nih tawh thu leh Tuipuibari PHC pawh a thawk tur Doctor hmuh a nih ve leh hawn nghal a nih dawn thu te a sawi bawk.

Pu Laldingliana DEO Mamit chuan Tuipuibari Secondary School din a nih theihna atana hmalakna hrang hrangte sawiin Tuipuibari mipuite duhsakna a hlan a ni.

School hawnna hun hi Pu A.Lalchhuana, Vice Chairman VC in a kaihruai a, Pu Laipoha, President MUP chuan lawmthusawina a nei bawk.

Mamit District chhung Tuipuibari khua-ah hian chenna In 750 awmin, mihring cheng mi 3500 vel an awm mek bawk a ni.