2042/2023-2024

Aizawl, 28.09.2023: September thla chhunga ram puma ei leh in țha leh hrisel pawimawhna inzirtirna POSHAN Maah 2023 kal mekah tukin khan Aizawl Thunders te nen a ‘Suposhan Diwas Motor Cycle Rally’ buatsaih a ni a. Social Welfare & Tribal Affairs Minister Er. Lalrinawma chuan tukin khan Bawngkawn Brigade Road atangin Rally a tel te hi a vailiam.

Thu sawiin Minister chuan sawrkar laipuia Ministry lamin a ruahman angin POSHAN Maah ah hian pa ten mawhphurhna pawimawh tak kan neih avangin PA TE NI (SUPOSHAN DIWAS) pawh hi hman turin a rawn duang a ni, tiin tukinah SUPOHAN DIWAS puala motorcycle Rally buatsaih a nih chhan a sawi. Minister chuan ei leh in tha kan nupui fanau ten an neih theih nan hian pa te (mipa te) hian mawh kan phur nasa hle in, an him na hi keimahni ah a innghat tlat a ni a ti a. Nu in nau a pai hlim atanga nau a neih thleng leh a enkawlna chu hmeichhiate kut chauh a dah chi a nih loh bakah mipate ko ah hmeichhia te mawhphurhna ai nasa zawk a innghah thu a sawi a. Nu in nau a pai in an hriselna endik pui te, nau a pian hun a nuin hnute tui tha taka a pek theih nan a nupuite ei leh in tha leh hrisel lo pek te leh naute hrisel leh than tha neih theih nan a fate enkawl te mipa mawhphurhna, mipa ko a innghat tlat a nih thu a sawi.

SW&TA Minister chuan mithiamten an zirchian na ah chuan nu in nau a pai atanga naupang kum 2 a tlin thleng hi naute hmalam hun thui taka hriltu: an hriselna ah te, an than dan ah te leh an puitlin hun a an calibre tur zawng zawng nen a hriltu a ni an tiin an ngai pawimawh em em a, ‘1000 Days Window of Opportunity’ an vuah thu a sawi a. Mizo te hi hnam hrisel leh than tha kan lo nih zual zel theih nan te, Mizo hnam in hma kan sawn zel theih nan tukin Motor Cycle Rally chu hmanraw tangkai a nih theih a beisei thu a sawi.

Motorcycle rally hi Bawngkawn Brigade Road atangin Ramhlun kawngah Silaimual thleng an tlan a. A vailiamna inkhawm hi Pi Zoramthangi Chhangte, Women & Child Development Director chuan kaihruaiin, kalkhawm zawng zawng te'n Slogan au rualna an nei bawk.