2041/2023-2024

Hnahthial the 27th September 2023 : District Election Office, Hnahthial chuan vawiin khan Systematic Voters’ Education & Electoral Participation (SVEEP) pualin South Vanlaiphai Higher Secondary School-ah Electronic Voting Machine (EVM) chungchang inzirtirna leh demonstration an nei.

Hnahthial District SVEEP Nodal Officer Pi K Ngosai chuan he hunah hian thu sawiin India ram chu mipui rorelna ram a nih angin kum 5 danah inthlanpui a awm thin thu a tarlang a, Hnam tlem zawk leh hnuaihnung zawkte tan malsawmna a ni tiin mahni duhthlanna ngei a ram roreltu tur thlan theih chu a hlu hle tih a sawi. SVEEP nodal officer chuan MLA inthlan kaihhnawiha puipa ber Election Commission of India chuan vote thlak a ngai pawimawh hle tiin Election kaihhnawiha awlsam zawk nana mipui vantlangte tan a duan mobile application hrang hrang c-VIGIL, Saksham-ECI Application, NVSP, Know Your Candidate leh a đang tam tak a duanchhuahte chu a tarlang a, awlsamna leh remchanna te chu hmang tangkai fo turin a chah a ni. ECI chuan kum 18 tling tawh chu mi mipuitlingah a chhiar tawh a, mahni duhthlanna fim tak hmang thei tawh turah ngaiin dikna chanvo leh mawhphurna a pe a ti a, vote thlak theih chu mihring intluktlanna leh zahawmna vawnghimtu a ni tiin India Danpuiah a chuan hial thu a sawi a, mi tu pawh India khua leh tui nihna nei leh kum 18 tling tawh tan chuan vote thlak chu tih makmawh leh mawhphurhna a ni a ti bawk.

Vawiin programme-ah hian Hnahthial District SVEEP team te chuan EVM chungchanga inhrilhhriatna leh entirna hun te an hmang a, zirlai naupangte chu EVM hmanga vote thlak chhin tir niin hun hlawk thlak tak an hmang ho a ni.