No.799/2021-2022

Dated Khawzawl, the 3rd June, 2021: Deputy Chief Minister Pu Tawnluia, Tuichang Assembly Constituency bialtu MLA in a bial chhunga African Swine Fever leng mek dona tur hmanrua chi hrang hrang a pekte chu vawiin chawhma dar 11:00 khan District Veterinary Hospital, Khawzawla Veterinary Officer Dr.Phillip Lawmsangzuala hnenah hlan a ni.

Thilpekte dawnsawn leh hlanna puala hun tawi A.H & Vety. Complex, Khawzawl Hermon Venga buatsaih hi Pu Lalhlimpuia’n a kaihruaia, thilpekte hi Deputy Chief Minister aiawhin Pu C. Kera’n Dr. Phillip Lawmsangzuala, Veterinary Officer, Khawzawl hnenah a hlan a ni. Vawk hrileng dona kawnga hmanruate hi Vawk vulhtute hnenah sem chhuah nghal a ni.

Thusawiin Dr. Phillip Lawmsangzuala chuan bialtu MLA, Dy. CM Pu Tawnluia’n Khawzawl District a ngaihsaknaah leh, mamawh a hnena an thlen apiangte a taka a tih hlawhtlin sak zel avangin lawmthu a sawi a. Dy. CM hmalaknaa Bleaching powder bag 20 lai a hmaa rawn pek tawh chu Khawzawl District chhunga Vawk vulha eizawngten an tangkaipui takzet a ni, a ti a. Vawk hri leng laka invenna hmanrua an lo sem chhuah tawh chuan Vawk hri leng lakah Vawk vulh mekte puiin, Vawk thi pun belh zel tur pawh a venghim thawkhat viau ni a a hriat thu a sawi a. An dilna leh mamawhte rang taka tih hlawhtlin sak thintu Deputy Chief Minister Pu Tawnluia chungah Animal Husbandry & Veterinary Department, Khawzawl District hmingin lawmthu a sawi a ni.

Vawk hri leng laka invenna hmanrua Dy. CM Pu Tawnluia’n Khawzawl District tana a rawn pekte hi PPE full set 40, Sprayer 3, Hand sanitizer litre 10, Slaked lime (chinai thi) bag 15, Bleaching powder bag 15 leh Gloves-box 5 te niin, ASF Test Kit leh Sodium Hypochloride-te pawh procurement order siam fel tawh niin, remchang hmasa berah Khawzawl thlenpui tum a ni bawk.

A.H & Vety. Department Khawzawl District tarlan danin African Swine Fever (ASF) hi Khawzawlah a hmasa ber turin April ni 21, 2021 khan hmuhchhuah a ni a, tun thlengin hmunpui lama endik turin tissue sample 4 thawn tawh a ni a. Khawzawl chu Vawk hri lenna hmun infected area-ah May ni 10, 2021 khan puan a ni a, vawiin thlenga ASF vanga Vawk thi chhinchhiah tawh zat chu 170 tlingin, Khawzawl khaw chhunga thite an ni hlawm. Khawzawl khaw chhunga Vawk la dam chhinchhiah zat chu 1461 a ni.

A.H &Vety. Department ruahmannain Vawk thite hi uluk taka chinai nena phumbo thin a ni a, Vawk in leh a velte bleaching powder hmanga tihthianghlim vek thin a ni a, Vawk thih tawhna hmunhmaahte ASF infected area sticker tar zel thin niin, geo-tagg vek a ni. Infected area-ah Vawk talh khap bur a ni a, hmun dang atanga lakluh leh hmun danga lak chhuah pawh khap tlat a ni.