4025/2022-2023

Khawzawl, 29th March 2023: Vawiin khan Khawzawl District Tennis Association (KZDTA) Tennis Court, PWD Complex, Khawzawl Vengthar a mi chu Deputy Chief Minister, Tuichang Assembly Constituency bialtu MLA ni bawk Pu Tawnluia chuan a hawng.

Hawnna inkhawm Khawzawl District Tennis Court-a neihah hian Pu Tawnluia chuan Khawzawlin Tennis Court hmunhma nuam tak an nei thei chu lawmawm a tih thu sawiin thalai infiammi ten tangkai taka an hman theih tur hmunhma tha petu PWD hotute hnenah lawmthu a sawi nghal a. Khawzawl khuain rual an awh thinna te chu District kentel hmasawnna ten an phuhru mek zel a, hmasawnna hnathawh kal mek te chu district fahrin an ni, a ti a. Hmuh theiha Khawzawl thanna chuan mipuite hnenah inrintawkna a pe mek zel a ni, a ti bawk.

Tunhnaia Khawzawlin Mizoram huap Volleyball leh Badminton inelna lian a thlen mai bakah Mizoram Football Association (MFA) Cup 2023 thleng tura thlan an ni chu thil lawmawm leh chhinchhiahthlak tak a ni Deputy Chief Minister chuan tiin, Khawzawl Vengtharah Auditorium changtlung tak din anih tur thu leh hnathawh tan thuai anih a beisei thu a tarlang nghal a. Vawiina hawn tak Tennis Court hmangtu te mai bakah khawtlang mipui tan Community Toilet PWD Complex-a dah anih theih nan theihtawp chhuah intiamin, Khawzawl district-a hmunhma hrang hrang ten hmasawnna kawng an zawh zel theih nan theihtawp a chhuah pui zel tur thu a sawi bawk a ni.

Vawiina hawn tak KZDTA Tennis Court hi kum 1993 khan hman tan a ni a. Tunhnaiah Balaji Construction ten an Corporate Social Responsibility Fund (CSR Fund) hmanga a chhuat chhun zawl hna an thawhsak hnuin Bialtu MLA Pu Tawnluia MLA Fund cheng nuai hnih (?200,000) hmanga cheithat (renovate) a ni.