4026/2022-2023

Dated Serchhip, the 29th March, 2023: Vawiin khan Er. Lalrinawma, Minister chuan, Rullam khaw luahleh Kum-50 na lawmna chu khuallian niin a hmanpui a; hemi rual hian Zoram buai laia ram leh hnam tana martar, Rullam a mite hriatrengna lungphun a hawng bawk.

Minister chuan, haw khawm runpui leh khaw luahleh kum 50 na hmang theia Rullam khuain malsawmna a dawng chu lawmawm a tih thu a sawi a. An khawmi ram tana martarte hriatrengna lung phun nachang an hria chu ropui a tih thu a tarlang bawk. Er. Lalrinawma chuan, he hun hlu takah hian khawtlangah inremna leh lungrualna lo par vul zual se, malsawmna tam tak khawtlangin dawng zel thei se a duh thu a sawi. Rullam khaw dintute leh khawtlang tana mi pawimawh tak tak he hun hmang remchang thei lo te, he hun hmang hman lova mual liamtate zahna chibai a buk a. Kum tam tak khawtlang leh mipuite tana lo thawk tawh thinte fakin, anmahni avangin vawiinah hetiang hun duhawm leh chhinchhiahtlak kan hmang thei a ni, a ti.

Rullam khawtlangin Martarte puala lung an phun chu ropui a tih thu tarlangin, Kan ram leh hnam a boral loh nan hnamah kan thanharh a ngai a, kan hnam tana martarte thisen luanna rama chengte hian kan pasalthate chawimawi nachang kan hriat hi a tul hle a ni. Vawiinah hian kan ram leh hnam tana an duh leh beisei an hlenchhuah hman tak lohte hre rengin, kan hmaa awmte rinawm taka kan thawh zel a tul a ni. Hnam fing apiangin an hnam Martarte an zahin an ngaisang mhin a, an thiltih an ngaihlu bawk thin. Kan hmaa lokal tawhte hnungzuiin mitinin kan eizawnna leh kan hnathawhna hrang hrangah ram leh hnam hmangaihna i pu thar zel ang u, tiin a sawm a ni.

He hun hi Pu Lalringliana’n kaihruaiin, Pu Pakunga’n hunserh a hmang a; Khualzahawm Pu Zomuana leh Ex- MNA Gen. Hqrs Treasurer Pu Vanropuia Sailo te pawhin thu an sawi a ni.

Ram leh hnam tana Martar mi 7 te hriatrengna lungphun hi Rullam khawtlang buatsaih niin khawtlang huap in Vuttaia Run ah an hmang a ni.