4027/2022-2023

Champhai, the 29th March, 2023: District Level Narco Coordination Centre (NCORD) Committee, Champhai District thutkhawm vawi 7-na leh kumin atana thutkhawm vawi 3-na chu vawiin chawhma dar 11 khan an Chairperson Pu James Lalrinchhana, District Bawrhsap hovin DC Conference Hall-ah neih a ni.

Vawiin thutkhawmah hian meeting hmasa February ni 16, 2023 a neih thurel bawhzui dan tlangpuite ngaihthlak a ni a. Champhai District Police leh Excise & Narcotics Department Champhaite hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpuite Addl. SP Pu C.Lalengliana leh Asst. Commissioner of Excise & Narcotics Pu Vanlalvura Ralte te hnen atanga ngaihthlak a ni.

He huna tarlan a nih dan chuan NCORD meeting hnuhnung ber February ni 16, 2023 a?anga vawiin March ni 29, 2023 inkarah Champhai District Police te'n ND&PS Act, 1985 hnuaiah case 8 an ziaklut a, hemi kaihhnawihah hian mi 10 man niin heng zinga 2 te hi ramdang mi an ni. Heroin hawng 314 (gram 3,666) man niin, Department lam chhut danin tualchhung market-a a hlut zawng Rs 94,20,000/- a ni.

Hemi hun chhung vek hian Excise & Narcotics Department Champhai te'n ND&PS Act, 1985 hnuaiah case 5 ziaklutin hemi kaihhnawihah hian mi 5 an man a; heng zinga mi 2 te hi ramdang mi an ni. Heroin gram 210, tualchhung rate-a Rs 2,52,000/- hu an man a ni.

Kumin bik January ni 1, 2023 atanga vawiin March ni 29, 2023 thlengin Champhai District Police-ten ND&PS Act, 1985 hnuaiah case 20 an ziaklut a, hemi kaihhnawihah hian mi 27 man niin heng zinga 6 te hi ramdang mi an ni. Heroin hawng 524 (gram 6305.96) man niin, Department lam chhut danin tualchhung market-a a hlut zawng Rs 1,57,20,000/- a ni a. Heng zinga hawng 16 mante hi Assam Rifles nena joint operation vawi 4 neih kaltlanga man a ni. Ganja kg 6.35, tualchhung rate-a a hlut zawng Rs 9,525/- man hu Assam Rifles nena tangkawpa man niin, Alprazolam mum 450 (gram 30), tualchhung rate-a Rs 15,000/- hu an man bawk a. Ruihhlo man zawng zawng hlut zawng hi tualchhung rate-a chhutin Rs 1,57,44,525/- a tling a ni.

Kumin chhung vek hian Excise & Narcotics Department Champhai te'n ND&PS Act, 1985 hnuaiah case 15 ziaklutin hemi kaihhnawihah hian mi 21 an man a; heng zinga mi 5 te hi ramdang mi an ni. Heroin gram 1199, Department lam chhut danin tualchhung rate-a Rs 5,43,800/- hu an man a; heng zinga hawng 70 (840 gram) te hi Assam Rifles nena joint operation kaltlanga man a ni.

NCORD hi kum 2016 ah din niin, kum 2019 ah khan siam that niin tunhnaiah chak lehzuala hmalak a ni a. May ni 10, 2022 ah District Level NCORD Committee member-te State Sawrkarin a siam fel a; hmalaknate Narcotics Control Bureau (NCB) lamah report zel thin a ni.

Vawiin meeting-ah hian NCORD Convener Pu Lalrinpuia Varte, SP Champhai leh Member dangte an tel a ni.