4028/2022-2023

Aizawl, the 29th March 2023: Governor Hari Babu Kambhampati chuan vawiin khanRaj Bhavan-ah Regional Institute of Paramedical and Nursing Sciences (RIPANS) tihlen tumna atana hnathawh mek te leh thlen chin te RIPANS Director leh Contractor te a sawipui a. He hunah hian hnathawh mek chungchang thlirhona neih a ni a. RIPANS kalpui dan te leh a hlawhtlinna, staff, zirlai leh building chungchang te pawh Governor hnenah hian report pek a ni bawk.

RIPANS hi India ram chhunga Nursing, Pharmacy and Paramedical Sciences te hmunkhata zirna kalpuina awm chhun leh Ministry of Health & Family Welfare, Govt. of India in a enkawl awmchhun a ni.

Governor Hari Babu Kambhampati chuan RIPANS, Aizawl a zirtirtute leh office staff te inpekna a zarah Mizoramah Nursing, Pharmacy and Paramedical Sciences zirna tha tak a awm mek a. Hei hi Mizoram tan mai ni lovin India hmarchhak state 8 te tana malsawmna a ni a ti. RIPANS atanga zirchhuak tawh zawng zawng atanga chhuta 93% laiin hna tha tak an hmu thei chu hlawhtlinna ropui tak a ni tih a sawi a. RIPANS atanga zirlai ten an zirchhuah hma hauh pawh a hna an hmuh theih nan Campus Interview te tam zawka buatsaih dan zawng tur leh hospital lian deuh leh company lian deuh te hriatah RIPANS chu hmelhriattir tum turin RIPANS hotute chu thurawn a pe bawk a ni. India ram chhhungah ngei pawh healthcare professional te mamawhna nasa takin a pung cho mek a – sawrkar hnuaiah, hospital leh healthcare facility hrang hrang hnuaiah leh damdawi siamtu company lian tak takah te hnathawh tur tam tak a awm mek a ni a ti a. India ram hmun tam takah Mizo nurse te chu hnathawk turin an duh bik thin tih a sawiin Mizo thalaite healthcare lama an hmingthatna chu chhuanawm a tih thu a sawi bawk.

Governor chuan RIPANS tihchangtlunna tura hnathawh mek chu a lo beisei aia thain Director hlui, Director thar leh an thawpui ten an vil chu lawmawm a tih thu a sawi a. Contractor te pawhin an intiamkamna te bawh chhe loa a hun pangai chhung ang deuhthaw a hmain an hna an thawk zo thei tur chu lawmawm a tih thu a sawi bawk a ni. Mizoramah project tam zawk chu a zawh tur hun aia kum 5 leh aia tlaiah te zawh theih hram a ni thin chu tih tawp a ngai a ni a ti. RIPANS chhunga building pawimawh tak tak te hi sak zawk a nih chuan India hmarchhak huam chhunga college of Nursing, Pharmacy and Paramedical Sciences thaber atangin India rama zirna in tha bik tih zingah RIPANS chu an inhlangkai thei dawn niin a sawi a. RIPANS chhunga khum 100 awmna Hospital pawh mipui tan a tangkai dawn hle a ni a ti.

Regional Institute of Paramedical & Nursing Sciences (RIPANS), Aizawl hi kum 1995-1996 khan North Eastern Council (NEC) hnuaiah din a ni a. April 1, 2007 khan Ministry of Health & Family Welfare in a enkawl tan a ni . Tunah hian RIPANS, Mizoram Nursing( BSc,MSc), Medical Laboratory Technology( BSc, MSc ), Radio Imaging Technology(BSc), Pharmacy( B.Pharm, M.Pharm leh Ph.D in Pharmacy) leh Optometry (B.Optometry) ah te zirtirna a kalpui mek a. Kumtin, course hrang hrang belhkhawm a seat awm zat chu 259 niin tunah hian semester hrang hrang belhkhawma zirlai awm zat chu 812 a ni mek. Tunah hian RIPANS ah Acedemic Building pathum – Block I – III a awm a, Seat 294 awmna mipa hostel 2 leh seat 390 awmna hmeichhe hostel a awm mek bawk. Tun thlenga RIPANS atanga zirchhuak tawh zat chu 3291 a ni a, heng zinga 93 % hian hnathawh tur an hmu vek a ni. RIPANS atanga zirchhuak te hi sawrkar, damdawiin, company leh a dangah te hna an thawk a. Rampawn - USA, Australia, Canada, Ireland, England, Norway, Singapore, UAE leh Denmark ah te RIPANS atanga zirchhuak mi tam takin hna an thawk mek bawk.

Ministry of Health & Family Welfare, Government of India chuan Fund Rs. 350.59 Cr. hmangin RIPANS tihchangtlun hna a thawk mek a. Heng building te, a thawktu lak tur leh a thuamna bungrua te hi peihfel a nih chuan kum khata zirlai lakluh theih zat chu a letin a pung dawn a ni. He hnathawk mek hi December ,2023-ah zawh fel tura beisei a ni a. Project component zinga pakhat khum 100 awmna hospital erawh chu mamawhna a san em avangin Dr Mansukh Manviya, Union Health Minister chuan August 2023 ral hmaa zo turin hriattirna a rawn pe tawh a ni. RIPANS tihchangtlungna kalpui mekah hian – khum 100 awmna hospital, staff & Nurse Quarter 18, seat 168 awm theihna hostel building, doctor quarter 22, Academic Block –IV (18 nos class room, 32 nos labs, 2 nos lecture theatres, 6 nos hod rooms) leh mi 1200 thut len theihna tur Indoor Sports Complex & Auditorium sak hna thawh mek a ni.

Tunhnaiah Ministry of Health & Family Welfare chuan RIPANS, Mizoram hotute chu khum 50 awm theihna tur Critical care Hospital( khum 100 a la tihlen theih tur) atan project siam turin thurawn a rawn pe bawk a ni.

RIPANS aiawh hian  Dr Sanjay Dinkar Sawant, Director thar, Dr.H.Lalrinmawia, Director kalchhuak ta,  , Dr Ruby Zo Ralte, AO leh official dang te an tel a ni.