4019/2022-2023

Khawzawl, the 28th March 2023: Vawiin khan Deputy Chief Minister, Tuichang AC bialtu MLA ni bawk Pu Tawnluia chuan Khawzawl khawchhunga sawrkar hmunhma leh hmalak mekna - Khawzawl Tourist Lodge, National Highway 6-a Khawzawl-Sinzawl-Thanlawn (KST) Junction leh Krishi Vigyan Kendra (KVK) te tlawhin a enfiah.

Khawzawl Tourist Lodge leh National Highway 6-a Khawzawl-Sinzawl-Thanlawn (KST) Junction ah hian Deputy Chief Minister hi NHIDCL leh Khawzawl khawtlang hruaitu ten lo dawngsawngin, an hmalak tawhna leh harsatna an tawh mek te an lo sawipui a. Deputy CM hian an hmalakna te chu fakin, an harsatna te chu chinfel dan zawn a nih tur thu a sawi a ni.

Khawzawl KVK hmuna inkhawm buatsaihah Deputy CM chuan kuthnathawktute tana KVK hmalakna chu fakawm a tih thu sawiin, kuthnathawktute kawhhmuhtu leh kaihruaitu ni zel turin a chah nghal bawk a. Mizoram intodelhna atan tha leh zung thawh huam ringawt a tawk loh thu sawiin Deputy CM chuan ram leilung, sik leh sa bakah hralhchhuahna (market) mil a thlai chin a pawimawh a ni, a ti a. He mi kawngah hian loneitute chu KVK-a mithiamte nen inrawn tlang a, an thurawnte la thiam turin a ngen.

Pu Tawnluia chuan a bial chhung Sialhawk leh Tualte-a lakhuihthei leh tomato chingtute hlawhtlinna chu lawmawm a tih thu sawiin, vawikhatah engkim tih theih ni lo mahse, hlawhtlinna hmuh theiha a awm ta chu a phurawm tak zet a ni, a ti a. Kuthnathawktute chu theihtawp chhuaha hmalam pan zel turin a sawm nghal bawk a ni.

Khawzawl District Bawrhsap Pu CC Lalchhuangkima pawhin thusawiin Khawzawl KVK chu Khawzawl District hmasawnna lungphum phumtute an ni, a ti a. Bialtu MLA kuthnathawktute chawikan tum tu an nei chu lawmawm a tih thu sawiin, sawrkar leh kuthnathawktute thawhhona tha tak zarah Khawzawl district chu ‘Horticulture District of Mizoram’ a chhal ngam a ni, a ti bawk.

He hunah hian Khawzawl KVK Senior Scientist leh Head ni bawk Dr. Malsawmkimi chuan inlawmna thu a sawi a, Khawzawl KVK hmalakna leh hlawhtlinna hrang hrang te sawifiahna hun a hmang bawk a ni.