Vawiin chawhnu khan Deputy Chief Minister Pu Tawnluia’n Non-Lapsable Central Pool of Resources (NLCPR) atanga sum hmuh hmanga sak Multilevel Car Parking, Mizoram New Capital Complex a sak mek chu a hmunah tlawhin thawktute a kawm a, hmalak chhunzawm dan tur te a sawipui bawk.

Deputy Chief Minister leh Urban Development & Provery Alleviation department minister Pu Tawnluia chuan Sawrkar pisa, mipui dawrtu tamna Mizoram New Capital Complex a motor hunna mumal leh remchang tak awm tur chu lawmawm a tih thu a sawi a,”He Multilevel Car Parking sakna tur atana sum mamawh , NLCPR in a tum zat tur pawh tihfel vek a ni tawh,” a ti.

Multi Level Car Parking sak nan hian Cheng nuai 3601 ruahman a ni a, a sak hna hi ni 20 November, 2017 a tan niin November 2019 a sak zawh hman tura beisei a ni. A building zau zawng hi 12696 Sqm niin motor 351 leh two wheeler 224 hun theih tura sak a ni a, a hna hi zaa 60 thawh zawh tawh a ni bawk.

Multi Level Car Parking at New Secretariat Complex, Khatla sakna tur hi NLCPR hnuaiah kum 2017-2018 khan sum hmuh a ni a, he hna thawktu tur thlan nan hian Tender chhuah niin contractor atan Vikas & Associates, New Delhi thlan a ni. Tunah hian central leh state atanga pawisa hmuh tur zawng zawng hi hmuh/dawn kim tawh a ni. Central share final installment Cheng Nuai 1900 hi tun hnaiah an rawn dah chauh avangin Administrative approval leh expenditure sanction dil tura hmalak mek a ni.
 
He building hi floor (chhawng) 9 a sang niin top floor hi food court leh office atana hman tur a ni a, floor dang zawng (8 floors) hi parking atan hman tur a ruahman a ni. Heng bakah hian rain water harvesting tank, motor silna, repairing workshop leh passenger lift (full floors) dah tel tum a ni bawk. Parking floor zawng zawnga motor chevel leh parking space ruak awm zat hi ground floor atanga hriat zung zunga motor lut leh chhuak awlsam taka remfel anih theih nan ruahmanna siam tum a ni bawk.