Vawiin khan Champhai DC Conference Hall, Keifangtlangah District AIDS Prevention and Control Committee (DAPCC) chu an Chairman Champhai DC  Dr.Naveen Aggarwal, IAS hovin an thukhawm.

Bawrhsap chuan  AIDS natna chu tun aia nasa zawka do angaih thu leh inzirtirna zau  zawka kalpui a tul thu a sawi a. Thawktute pawh inthlahdah mai lova inpekna nasa zawk nena hmathar la tura chahin, thahnemngai taka kan za vaia kan tanho phawt chuan rahchhuah duhawm tak kan thlen tir thei a ni, a ti a. Hnam leh khawtlang tana harsatna thlentu AIDS do leh ven kawngah member tinte chu ngaihtuahna nasa zawk lo seng tura chahin, kalhmang tha zawk leh ngaihtuahna thar neite chu thuneitute leh DAPCU lamte bengvar inthlahrung lo turin a chah nghal a ni.

 He hunah hian Dr. Sailianpuii, District Programme Manager, District AIDS Prevention and Control Unit (DAPCU) chuan undivided Champhai  District chhunga HIV/AIDS dinhmun tlangpui powerpoint presentation hmanga pein a sawifiah a, district dinhmun thlirho niin,  hmalak zel dan tur sawiho a ni a. Meeting chuan a tam thei ang ber HIV/AIDS chungchangah inhrilhhriatna neih nise tiin, hemi avanga tawrhna nasa zawk a thlen lohna tura hmalak a tul thu leh a punlun zel lohna kawngah Kohhran, NGO,Media leh khawtlang hruaitute thawhho angaih zia tarlan a ni a. Zirna In hrang hrangah leh Biak In lamahte pawh hemi hawizawnga inzirtirna kalpui tura ngenna siam nise tih a ni bawk.

DAPCU Champhai-in a tarlan dan chuan January 2019 atanga August 2019 thla thleng khan ICTC-ah mi 5128 te thisen test sak an ni a. Mipui vantlang (General Public) thisen  test  3192 zinga 111 te chu HIV Positive tih  hmuhchhuah niin, Nu nau pai thisen test 1936 zinga mi 14 te HIV Positive tih hmuhchhuah a ni a. HIV Positive hmuhchhuah zat hi 125  a ni.  Nikum 2018 (January-December) khan thisen  test  6964  atangin HIV Positive 153 (General Tested - 4247, Positive - 137; ANC Tested - 2717, Positive-16)  hmuhchhuah a ni a. DAPCU zirchianna January 2019- August 2019 in a tarlan dan chuan HIV kai thar hmuhchhuah tam berte chu inchiuna Syringe thianghlimlo hman pawlh avang niin, mipa zinga 42% leh hmeichhe zinga 7% te an ni a. Mipat hmeichhiatna hman vanga kaiin dawt lehin hemi vang a kai hi Mipa zinga 29% leh Hmeichhe zinga 27% an awm a ni.  Nu atangha Naute in a kai   Mipa 3% leh Hmeichhia 2%  awmin, a chhan hriat loh 1% a awm bawk.  Kum bithliah Age group-ah  kum 25 atanga 34 inkar zingah HIV kai thar tam berin, Mipa 37% leh Hmeichhia 13% ten an kai a, kum 35 leh 49 inkarin dawtin  Mipa 18% leh Hmeichhia 9% ten an kai a ni.  ICTC-ah kum 2002 atanga August 2019 thlengin  mipui vantlang thisen test 50754 atangin mi 1639 in HIV an kai tih hmuhchhuah a ni a, hei hi za  zela 3.23 a ni a. Nu naupai  thisen test 28954 zinga 202 te chu HIV positive niin, hei hi za zela 0.70 a ni.

 ART Centre Champhai hi December 2010 a bul tan kha niin CD 4 Machine hi January 2015 ah khan bunfel a ni a. Tun thlengin mi 1743 in register tawhin tun dinhmunah mi 999 ten ART an la mek a.   OST (Opiod Substitution Therapy) hi Champhaiah leh Khawzawlahte  kalpui niin, mi 935 ten an la meka chhinchhiah a ni. Undivided Champhai District-ah hian Mobile Unit tiamin ICTC 5, Targeted Intervention (TI) 3, ART Centre 1, OST 2, LWS 1, CSC 1, STI 1, FICTC 10 leh Blood Bank 1 a awm mek a ni.

 DAPCC Meeting-ah hian Pu Alexander V.Chongthu, Addl DC; Pi Ethel Rothangpuii, PD, DRDA; Pu Zoremthara Ralte, SDO Sadar; Dr R.Lalawmpuia, CMO;  line department hrang hrang aiawh, Dropping Centre-a thawktute, NGO leh khawtlang hruaitute  an tel a ni.