Vawiin khan Swachh Survekshan Grameen 2019 hawnna leh Swachh Prerak Day Chhimveng YMA Hall Mamit-ah hman a ni a. Dr Lalrozama, IAS Chairman District  Water & Sanitation Committee/ District Bawrhsap ni bawk chuan khuallian niin a hmanpui.

Dr Lalrozama, chuan PHE Department chuan faina leh thianghlimna kawngah hma nasa takin an la a, faina lama hma kan lakna kawngah vantlang hnatlang ang te'n thawh thin a ni a. Kan hmalam hun zel atan hetianga intur chhuah emaw ngailo hian faina hi kan thinlungah intuh se, fai tura inzirtir hi ngai tawhlo tura faina chu kan nuna bet tlat anga kan ngaih a pawimawh thu a sawi.

Faina leh thianghlimna chu hmasawnna kailawn, puitling zia a nih avangin faina kawnga hmalam pan tum zel turin kalkhawmte a chah a. District Bawrhsap hian Swachh Survekshan Gramin 2019 hawnna a neih rual hian Village Watsan Committee te'n tangkai taka an hman tur T-Shirt tlangzarhna a nei nghal bawk a ni.

Dr Lalrozama, District Bawrhsap hi PHED Mamit Watsan Division te chuan faina lama hmalakna kawngah a thawh hlawk avangin chawimawina an hlan bawk a ni.

He hun khualzahawm ni-a hmanpuitu Er H. Duhkima, Superintending Engineer, PHED & State Co-Ordinator, Water Sanitation Support Organisation chuan Mamit District chu pawna inthiar awm tawh lohna-a puan kan nih tawh angin ODF District kan nihna chhunzawm reng a tul thu a sawi a, faina kawnga ke pen tura hun insiam a, in leh a vel mai bakah kan taksa thlenga vawn thianghlim tum deuh deuh turin kalkhawmte a chah bawk a ni.

Pi Laltharzeli National Awardee ( Women) pawhin Mamit District leh khawpui faina atana hma a laknain rahtha a chhuah zel thu sawiin, Mamit chuan faina kawnga hma a sawn chu hmuhhmaih chi rual a nih loh thu a sawi bawk.

He hun hi Er. Lalzawmliana, Sr. EE PHED Mamit Watsan Division chuan kaihruaiin Mamit District chhunga khawfai thlanchhuah pathum pakhatna Reiek pahnihna Lallen leh pathumna Kawrtethawveng khuate hnenah chawimawina hlan an ni. Hei bakah hian Mamit District chhunga Swachhagrahi 40-te chawimawina pek niin District chhung Watsan thawk tha khuate hnenah chawimawina hlan an ni bawk.