Vawiin khan Deputy Chief Minister Pu Tawnluia, Public Health Engineering (PHE) Department changtu chuan a chenna in Aizawl Chawnpui Venga programme buatsaihah tui bill pekna thar Mobile Point of Sale (MPOS) a tlangzarh.

Deputy Chief Minister Pu Tawnluia chuan mipuite tan awlsam zawka tui bill pekna MPOS hman theih a ni ta chu lawmawm a tih thu a sawi a. He khawl thar hmang hian Aizawl khawpui chhungah tui bill awlsam tak leh rang takin a pek zung zung theih tawh dawn a, phone hmangin emaw, ATM card leh cheque hmangin emaw awlsam taka pek theihna tur ruahmanna thar PHE Department-in a siam chu mipui tan leh sawrkar tan pawha zangkhaina leh awlsamna tam tak siamtu a ni dawn tiin PHE Department-in rahbi thar a kai a ni, Deputy Chief Minister chuan a ti.

Khual zahawm Pu Amjad Tak, PHE Secretary pawhin India ram State lian zawk thenkhatte pawhin an la kalpui theih loh digitisation Mizoram PHE in a kalpui thei chu a lawmawm hle a ni a ti a, MPOS hi tangkai taka mipui an hman ngei a beisei thu a sawi.

HDFC Bank te nen thawk hovin mipuiin awlsam taka tui bill an pek theihna ruahmanna PHE Department chuan a siam a, hman man awm lovin HDFC hian heng khawlte hi PHE a hman tir a ni. MPOS hmang hian dawr changkanga ATM card hmanga thil kan lei thin ang hian tui bill a pek theih tawh dawn a. ATM card emaw, cheque emaw a hman theih a, pawisa faia pek duh tan  pawh pek chhunzawm theih a ni. He khawl hian bill receipt a print theih avangin PHE bill counter -ah printer leh paper hranpa hman a ngai tawh dawn lo va. Sawrkar sum senso pawh a tlem phah dawn a. Internet hmanga tui bill pe thin ten an chawi belh thin ang kha awm tawh lovin a thlawn vekin heng khawlte hi a hman theih a ni. MPOS khawlte hi PHE tui bill counter tinah dah a ni dawn a. Bill pek rualin a khawlpui (main server) ah pek zat a lo in chhinchhiah zel ang a. Bill pek dawnin consumer number emaw bill number emaw chhut luh ani ang a, khawl hian bill detail a rawn tarlang dawn a ni. 

PHE bill counter-a kal kher lovin mahni in lum atangin android phone hmangtute chuan playstore-ah PHE Smart Water Application download in an install ang a, consumer number hmanga in register-in awlsam takin a pek theih a. He app hmang theilo tan pawh internet-a online bill pekna link: billpay.phedmizoram.in hmangin a pek theih bawk. PHE Department hian mipuin awlsam zawka tui bill an pek zung zung theihna turin hma a la mek zel a, meter reading lak ruala bill print mai theihna hand held device-te pawh an hmang tawh bawk a ni. 

MPOS tlangzarhna inkhawm hi  PHED Engineer-in-Chief Er.Lalmuanzova chuan a kaihruai a. HDFC Bank aiawhin khawl hman dan sawifiahna hun a hmang a. Aizawl Watsan Circle SE Er.Anup Chhetri chuan lawmthu sawiin hnu a khar a ni.