Vawiin khan Lawngtlai Bawrhsap Pi Shashanka Ala, IAS chuan Lawngtlai District chhunga naupang kawthalo hri danna (Rotavirus Vaccine) pek runpui neih tur chu Lawngtlai Electric Veng Anganwadi Centre-ah a hawng.

Lawngtlai Bawrhsap Pi Shashanka Ala chuan nausen leh naupangte kawthalo laka venhim an nih theihna atana hri danna (vaccine) pek an ni tur chu lawmawm a tih thu sawiin, rotavirus laka him turin Lawngtlai District chhunga nausen leh naupangte'n he vaccine hi an dawn vek theih nan thawktu zawng zawngte chu thahnem ngai taka an hna thawk theuh turin a chah a ni.

RVV Launching Programme hi Lawngtlai Chief Medical Officer (CMO) Dr Lalthlamuana chuan kaihruaiin, District Immunisation Officer (DIO) Dr S. Thaizi chuan rotavirus chungchang leh vacccine pek dan tur a sawi fiah a. RVV hi nausen leh naupang kawthalo venna vaccine niin, naupang kum 1 hnuai lamte pek phawt an ni dawn a. Tun tumah hian a hmasain nausen thla khat leh a chanvea upa hnenah pek phawt a, chumi zawhah kum khata upate hnena pe leh turin ruahmanna siam a ni. 

India ram pumpuiah Mizoram hi Rotavirus Vaccine pek runpui kalpui tur state 12-na kan ni a. He vaccine kalpui tur hian regional, state, district leh block level-ah te training hrang hrang neih vek tawh niin, he'ng training-ahte hian Medical Officer te, Health Worker leh ASHA Worker te bakah, Anganwadi Worker te chu he vaccine chungchang leh a pek dan turte zirtir vek an ni.

Lawngtlai District chhunga RVV pek bul tan turah hian Anganwadi Centre 100-a naupang 200 vel target niin, vawiin atang khan vaccine hi pek tan nghal a ni.