3062/2022-2023
Aizawl the 15th December 2022 : Deputy Chief Minister Pu Tawnluia chuan vawiin khan Mizo Students’ Union (MSU) buatsaih Sikpui Lunglen (Cultural and Traditional Day) chu Lalsavunga Park, Hlimen-ah hmanpuiin, khuallian a ni.

Khuallian Pu Tawnluia chuan vawiin programme-a sawm a ni chu lawmawm a tih thu sawiin Sailo Lal, Lalsavunga hmingchawia khawtlangin a hming reh tawhloh nana Park hming an lo sak chu an remhria a ti a, hetiang mi hmasa, sulsu tute kan hriatreng hi kan hnam kan chawimawina niin tangtharte pawhin-a kan ngaihhlut zel a pawimawh a ni a ti a. Khuallian chuan Mizo Student’s Union chu zirlaite kawng dik kawhhmuhtu, ram leh hnam hruaitu turte kaihruaitu an nih thu sawiin hnam a lo dinchhuah theihnana mi hmasa ten, an theihna zawng zawng hlana kawng an lo sial tawh chu thangthar zel lo la awmtur leh a bikin zirlaite hian kan ngai pawimawh leh zual tura a ni a ti a. Hnam inpumkhatna, venhimna leh midangte nena thawhho thiamna a pawimawhin a tul zel dawn a ni a ti a. Kan pi leh pute hunlaia ‘zonunmawi’ chhawm nung zel turin leh Mizo hnam leh Mizoram tan an theihnate hlan turin zirlaite a chah bakah kan theihna a tlem emaw a tam emaw kan hmazawna tihtur awm reng rengah husaisen taka theihtawp chhuah zel tura chahin MSU hruaitu thar te an kal zelna turah duhsakna a hlan nghal a ni.

Khuallian hian MSU Music Video ‘Zonunmawi Chawila’ tih chu a tlangzarh nghal a, he video hi vawiin tlai-ah youtube-ah upload tur a ni ang.

He hunah hian MSU Kulva Choir hnen atangin hla ngaih thlak a ni a, MSU Kulva Cultural Club ten hnam lam an entir bawk a ni.

Chawhma hun hi MSU Vice President Laldinsanga’n a kaihruai a, chawhnu lamah thusawi, zai hrang hrang ngaihthlak a nih dawn bakah hnam lam chi hrang hrang entir a ni dawn bawk a ni.