3063/2022-2023
Aizawl the 15th December 2022 : Vawiin khan School Education Minister Pu Lalchhandama Ralte chuan Ratu khuain Ratu playground-a Lo neitute ni, buh thar tam lawmna hun an hmanchu khuallian niin a hmanpui a, Godown sak thar a hawng bawk.

Minister chuan he hunah hian thusawiin Ratu khuaten  lo neitute Ni hmanga lo neitu hlawhtling chawimawina chang an hria chu Zoram khawvelin entawn se, a duh thu a sawi a. Minister chuan Ratuah buh thar tam lawmna neih anih laiin buh chhek khawlna tur Godown hawn thar a ni bawk chu a inhmeh a, a lawmawm hle a ni a ti a. Kan ram leilung ațanga thar chhuah buh chu sorkarin lei a duh tih hre turin lo neitute a chah a, lei tur neih pawh tum turin a fuih bawk a ni.

Minister chuan hmar tlang dung chu kawtchhuah thar kawngpuiin a hrut thuai dawn a, sorkar laipui thuneituten kawngpui sialna tur sum an puan tawh avangin Manipur nena inkal pawhna kawngpui sial a ni dawn a, Bagha kawngpui pawh sial turin inbuatsaih mek a ni a ti a.  Hmar tlangdung zirna tlabal tawh tak chu tuai thar a ni a, zirtirtu dah belh leh building sak bakah Higher secondary hawn a ni a, kum tharah hian Science leh commerce stream bakah High School pawh hawn belh a ni leh dawn tih a sawi bawk. Minister chuan Pathianin min pek theihna hmang țangkai a, sorkar scheme te pawh bul țan nana hmang țangkai ngei turin kalkhawm te a chah a ni.

Khualzahawm Pi Lalengzami DAO Agriculture Department pawhin thu a sawi a, Aizawl District-ah hian lo neihna ram 2300 hectare a awm a, kum khata thar chhuah chu 2900 MT anih thu a sawi a. Lo neitute Ni hman chu Agriculture Dept ten an thlawp thu leh kum dangah pawh hman zel theih an duh thu a sawi.  

Ratu khuaah hian kum 2021 khan lo nei mi 229 an awm a, phur 8671 an thar a, tun hnai  kum 5 chhunga an thar tam ber kum a ni a, kumin 2022 hian lo nei 114 an awm a, phur 6375 an thar a ni. Kumin hian buh phur 100 chin thlo chhuak mi 15 an awm a, a thar tam ber Pu Lalnunsiama'n phur 202 a nei a, phur khat hi țin 3 a ni. 

Pu R.Lalhmingthanga Ratu VCP chuan Covid 19 hripui len lai leh hun dangah pawh Ratu khua loneitute avangin khawtlang mipuite an thlaphang ngai lova, lo neitute hian an thar ang ang lo nei ve lote an sem țhin a, buh leh thlai man te pawh lo neih hlat leh hnaihah a innghat chuang lo, a ngai reng tih a sawi a. Zonun ze mawi tilangtu loneitute nghet takin an ding a,  khawtlang an thlamuan a, lo neitute Ni hi anmahni chawimawi nan an hmang tih a sawi. 

Pu Lalchhandama Ralte  hian vawiin khan Ratu Godown sak thar chu a hawng bawk a. He Godown hi NABARD ware housing scheme ațanga sak a ni a, buhfai qtls 2000 dah theihna a ni. Godown bakah hian staff quarters pahnih nen cheng nuai 204.41 senga sak a ni. Ratu Godown hi Babie construction & consultancy services te sak a ni. 

Lo neitute Ni hmannaah hian khawtlang hruaitute, lo neitute bakah khawtlang mipui  an kalkhawm a ni.