3064/2022-2023
Dated Leng, the 15th December, 2022: Vawiin khan Leng khua chuan National Panchayat Award pathum; Deen Dayal Upadhyay Panchayat Sashaktikaran Puruskar, Nanaji Deshmukh Rastryia Gaurav Gram Sabha Puruskar leh 2nd National Award, 2019 lawmman pakhatna an dawnte khawtlangin ropui takin an lawm a. He hunah hian Home Minister leh bialtu MLA ni bawk Pu Lalchamliana chu khuallian a ni a, Pu K. Lalrinliana, Supply Minister chu khualzahawm a ni.

Award lawmna inkhawm neih tan hmain khualzahawm Pu K. Lalrinliana'n Leng Village Council House (Panchayat Bhavan) Rs. 20 lakh senga sakna tur lungphum a phum hmasa a. Chumi hnuah khuallian Pu Lalchamliana'n Award lung pathum, Leng khaw laili tak, Lallungkawna an phun hawnna a nei ve leh a, chumi hnuah Saihnuna Hall ah a lawmna inkhawm an hmang zui a ni.

A lawmna inkhawmah khuallian Pu Lalchamliana chuan, India rama thingtlang khua nuai hnih singnga chuang awmnaa National Award pathum dawng thei Leng khua hi a chhuanawm hle a, Mizoram min tihmingtha em em a ni. Hetiang tithei khua hi India ramah an awm theih pawh a rinawm tawh lo hial a ni. He dinhmun in thlen theih chhan chu khawtlangin VC tha inneih vang leh khaw mipuiten kan VC te tha taka in lo thawhpui vang a ni a, ka thinlung hi a lawm em em a ni. He nunphung hi inchhawm zel chuan ram pum huap lawmman dang duhawm tak tak pawh in la dawng chho zel theiin a rinawm. Vawiina kan lawm lawmman pathumte hi a tawpna nihtir phal lo ula, a bultannaah lo ngaiin lo bei sauh sauh ang che u, tiin a chah a ni. Khaw tam takin hetiang hmasawnna hi kan duh ve vek awm e, mahse mahni ngeiin thawhchhuah a, sual chhuah dan dap silova sawrkara zaa zaa kan inghah hlawm tawp reng chuan hetiang hlawhtlinna hi neih theih a ni ngai lovang. He khawtlangin sawrkar ringawta innghat lova heti taka hmasawnna a hmu hi entawn tlak a tling tak zet a, kalphung thar kan mamawh tak chu Leng hian a zawh mek a ni ber, a ti a ni.

Khualzahawm Pu K. Lalrinliana pawhin thusawiin, Leng khuain ram pum huap lawmman pathum a dawng thei leh chung zinga pahnih chu LAD lam kaihhnawih a ni hi chhuanawm ka ti a. Leng khua leh tuite tan Leng khua nih a nuamin a chhuanawm hle dawn a ni, a ti. Hetiang lawmman dawng tur hian hun rei tak taima taka hmalak ngai a ni tih ka hriaa, chutiang tithei khawtlang hruaitu innei leh mipuite in inlungrual hi a ropui em em a ni. India sawrkar pawhin hetianga Panchayat inelna hi hlawk a tih avangin a ngaipawimawh tial tial a, tun hnuah phei chuan lawmman hi cheng nuaih za chuang dawn theihna tur a awm tawh a ni. Chuvang chuan lawmman dawng chho zel tura beih sauh sauh a tha a, khaw dangte pawhin nasa takin hma la ve se a duhawm hle a ni, a ti bawk. Pu K. Lalrinliana hian Local Administration Department in Leng khua lawmpuina an pek pawisa fai a hlan nghal a ni.

Awards lawmna inkhawmah hian kum 2022 chhunga Leng khuaa buh leh thlai thar tam ber ber thlan chhuahte hnenah chawimawina hlan an ni.

Leng khuain National Award pathumte an dawn sawifiahna Pu Lalchawimawia, Jt. Director, LAD in a nei a, 2nd National Water Award an dawn theih chhan chu khawtlangin tuihna humhalhna hmalakna tha tak tak an kalpui vang a nih thu a sawi a. National Panchayat Award hi India rama thingtlang khua nuai hnih singnga chuang fe awmnaah sawrkar laipui chuan fel fai takin huang hrang hrangah inelna a kalpui a. Kumina an lawmman dawn pahnihte hi khawtlanga eizawnna leh ngelnghehna a awm theih nana Gram Sabha hmang tangkaitute hnena pek leh Village Council khaw chhunga nunau leh mipui nunphung a that theih nana hnathawk thate hnena pek lawmmante an ni.

Tlai lamah khawtlang huapin ruai theh a ni a, Sial pahnih leh vawk pahnih an talh a ni. Vawiina Leng khuain National Awards an lawmna senso bultumtu ber hi khuallian leh bialtu MLA, Pu Lalchamliana, Home Minister a ni.