2994/2022-2023
Khawzawl, the 8th December, 2022: Mizoram State Sawrkar sum cheng nuai 700 senga Mualvawm Playground, Khawzawla Phullem Artificial turf phah (Providing & Installation of Artificial Turf at Mualvawm Playground, Khawzawl) leh cheng nuai 400 senga Pavilion sak (Construction of Pavilion at Mualvawm Playground, Khawzawl) te chu vawiin chawhma dar 11 khan Deputy Chief Minister Pu Tawnluia, UD&PA Department changtu Minister chuan khuallian niin a hawng a, a enkawl chhunzawm zelna kawnga mawhphurtu tur District Bawrhsap kaihhruai Post Construction Management Committee kutah hlan nghal a ni.

Deputy Chief Minister Pu Tawnluia chuan State sum senga Mulvawm Playground-a Phullem phah leh Pavillion hawn a ni chu lawmawm a tih thu sawiin, "Khawzawl District tana ni chhinchhiah tlak takah hian District mipuite rualawhna leh tanrualnate, District a lo pian theihna tura hruaitu hmasate inpeknate rilruah a lang thar leh a, Khawzawl District mipuite inpekna avang leh inlungrualna avangin District hi a lo piang a, chumi zarah chuan Mulvawm Playground changtlung leh Pavillion tha tak hi a lo awm thei ta a ni, a ti a. Mualvawm Playground changtlung tak chuan player tha, mahni thahnemngaihna hmanga eizawnna tluantling nei tur a chherchhuah ngei a beisei thu a sawi a. A hlawhtlin theih nana tha thawhtu zawng zawngte, a bik takin UD&PA Secretariat leh Directorate lama thahnemngai taka thawktute fakawm a tih thu a sawi a, a enkawl zui zel kawnga mawhphurhtu tur District Bawrhsap kaihhruai Post Construction Management Committee-te inkaihhruaina leh kalzel dan tur chu Sawrkarin tul a tih angin a enpui thin dawn a ni, a ti bawk.

UD&PA Department changtu Minister chuan UD&PA Department-in khawpui changkanna leh hmasawnnate, hma lam pana ke pen zelna tura tangkaite a buaipui thin thu tarlangin, chumi zingah chuan khawpui chhunga infiamna hmunhmate tihchangtlun thin anih thu leh khawpui hrang hrangahte hmalak anih thute a sawi a. Games & Sports chu khawpui cheina leh khawpui a chengte nun chawikanna anih tel avangin hetiang lam hawia hmalak a ni a, kan thatpui ngei kan beisei a ni, a ti a. UD&PA in playground a siam tawh chinah Mualvawm Playground chu FIFA in a pawmpui certified awm chhun anih thu leh chhuanawm a tih thu a sawi a. A enkawl leh tihfai kawngah mipuite chu neitu thinlung pua an mawhphurhnate tha taka hlen turin a chah a. Sawrkarin infiamna tihhmasawn nan theihtawp a chhuah mek zel thu sawiin, Khawhai leh a chhehvel khuate hman theih tur phullem phah theihna field liantham tak siam tura hma lak mek zel anih thu tarlangin, NHIDCL te phungbawma sawmin tunah hian Khawhai field laih pawh bul kan tan tawh a, reiloteah laih zau hna hi kan thawk zo dawn a, phullem phah turin theihtawp chhuahin hma kan la zel ang, a ti bawk.

Pu Tawnluia chuan Khawzawl-ah Mizorama Volleyball Court phullem phah hmasa ber siam anih thu sawiin, Electric Veng PHE Compound-ah Basketball Court mumal tak siam tura hmalak mek anih thu leh reilotea hna tan tum a nih thute, Khawzawl Vengthar Hall Badminton Court tihchangtlun anih thute a tarlang a. Mualvawm Field bul maiah Futsal Ground siam tura hmalak tum anih thu a sawi bawk a. Khawzawl District chu infiamna chauh nilo kuthnathawktute taimakna zarah sum leh pai dehchhuah kawngah pawh a than mek zel thu sawiin, thalaite chu rualelna dik neia hmasawnna lam pana theihtawp chhuaha tha thlah lova tang zel turin a chah a ni.

He hun hi Pu H. Lianzela, Director, UD&PA Department chuan kaihruaiin kalkhawmte lawmna thu a sawi a. Upa Rohmingliana Colney-in hunserh a hmang a, technical report  Pu C. Malsawma, Executive Engineer, UD&PA Department hnen atanga ngaihthlak niin, Pu Chuauhnuna, Deputy Secretary, UD&PA Department leh Pu K. Vanlalsiama, Chairman Joint V/C, Khawzawl te'n thu an sawi bawk a. District Bawrhsap Pu C.C. Lalchhuangkima'n lawmthu sawiin hun a khar a. Hemi hnu hian Khawzawl District Football Association buatsaih Mana Motor 4x4 Pik Up Inter Village Football Tournament Final Khawzawl Vengthar VC Team leh Khawhai VC Team ten an khel a, inkhel hmuhnawm takah Khawzawl Vengthar VC Team-te chuan 4-0 in hnehna an chang a; Khawzawl District Inter Village Football Tournament hmasa ber Champion an ni.

Khawzawl Mualvawm Playground-a phullem Artificial turf phah hna hi Syncotts International, New Delhi-te chuan an thawk a. Work order hi November ni 11, 2019 ah pek an ni a, August ni 2, 2022 khan hman theih turin he hna hi an zo fel a ni. Mulvawm Playground hi UD&PA Department hnuaia playground siam tawhah chuan FIFA Certified hmasa ber a ni a. A phullem ngau ngau hi a dung metre 109 leh a vang metre 72 a zau ni a, play area zau zawng hi a dung metre 105 leh a vang metre 68 a ni a, a hungna tha tak siam niin, goal post, corner flags & rotatory brushing machine-te pawh dah tel a ni.

Khawzawl Mualvawm Playground-a Pavilion sak hna hi LHM Infra, Khatla, Aizawl ten an thawk a, work order hi February ni 26, 2021 ah pek niin, November ni 30, 2022 khan hna an zo fel a ni. Pavilion hi a dung metre 30 leh a vang metre 12.35 a zau a ni a. Ground floor leh first floor hi gallery atana hman tur a ni a, mi 540 bawr vel leng thei tura ruahman a ni a. VIP restroom bakah mipa leh hmeichhe inthiarna dah niin, wash basin 4 dah a ni bawk a. Basement floor-ah office leh player-te inthlakna changing room a awm a. Restroom/washroom dah tel a ni bawk a. Pavilion chung hi steel roof truss hmanga siam a ni a, pre-coated roofing hman a ni bawk.