No.3486/2021-2022

Aizawl, the 21st December 2021 : Vawiin khan Deputy Chief Minister Pu Tawnluia'n Multi Level Car Parking, MINECO a hawng a. Deputy Chief Minister hi Minister K. Lalrinliana, MLA te- Prof. F. Lalnunmawia, Pu L. Thangmawia, Pu C. Lalmuanpuia, Pu Zothantluanga, Pu Zodintluanga, Pu Lalchhuanthanga ten an tawiawm a ni.

Deputy Chief Minister Pu Tawnluia chuan vawiin programe buatsaihtu te chungah lawmthu sawiin, UD&PA Minister lo ni tawh thin Pu Zodintluanga chungah pawh lawmthu a sawi a. Multi Level Car Parking hi kan vaia tankhawmna avanga hlawhtling a ni a ti a. Sawrkar hmasa in bul a lo tan tawh chu hlamchhiah mai lo in, tih puitlin nan tun sawrkar in theihtawp a chhuah a ni, a ti a. Sawrkar hmasa tih vanga hnual mai lova, thiltha a nih avanga chhunzawm a ni a, project phuailuai erawh chhunzawm theih a ni thinlo a ni a ti a. Tun hma chuan Car Parking pawimawhna te hi a awm meuh lo a, tun dinhmunah erawh khawpui a lo thang zel a, motor dahna leh parking hmun awl kan mamawh zel a, Urbanization-ah kan thang hle tih a hriat a, changkanna kalzelah kan vei vahna-ah kan hawl chhuak loh thei lo a, motor, two wheeler te chu nitina kan mamawhte zinga mi a lo ti chho ta a, vawiina Multi Level Car Parking hi Secretariat dawrtu mipui te bakah thawktu department hrang hrang tan tangkai taka hman a nih theihnan duhsakna a hlan a ni.

Pu Tawnluia chuan khawpui hmasawnna leh mawhphurhtu UD&PA Department hian nasa takin hma a la nasa em em a, bawlhlawh sawngbawl, urban transportation, urban housing, urban economy, urban poverty alleviation thlengin Department kutah a awm a ni a ti a. Heng bakah hian PWD te nen tangkawpin kawngpeng siam rem leh zauhna kawngah te hma la in, ke a kal te tan pawh pedestrial footpath mawi hnai tak tak te siam chho zel a ni, tiin a sawi a. UD&PA Department chuan Aizawl Sustainable Urban Transport Project lian tham tak pawh a buaipui chho mek zel a ni tiin a sawi.

UD&PA Secretary Pu K. Lalthawmmawia'n he hun hi a kaihruai a. Additional Secretary Pu J.C Ramthanga leh Planning & Programme Implementation Secretary Pu Lalmalsawma Pachuau hnen atangin thusawi tawi ngaihthlak a ni a. Joint Director Pu H.V. L Zarzoenga hnen a?angin Technical Report ngaihthlak a ni a. Director Pu H. Lianzela'n lawmthu sawiin he hun hi a khar a ni.

Multi-Level Car Parking, MINECO Aizawl sakna tur hi kum 2017 khan Ministry of DoNER, Govt. of India atangin sum Rs. 3601.00 lakh hmuh a ni a, Contractor hi Turnkey basis-a thawk turin Open Tender kaltlanga zawn a ni a, Vikas & Associates Delhi chu thlan a ni. State Matching Share hi Rs 3.6 crore niin, July ni 12, 2018 khan a lung phum a ni. A tira ruahman ang chuan hnathawh hun chhung tur hi kum 2 a ni a amaherawhchu Turnkey contract anih avangin hnathawktura tihfel ngai tam tak a awm a, a hun takah hna hi zawh theih a ni ta lo a ni. Hei bakah hian Covid-19 avangin zawh tlai a ni bawk a ni.

Multi-Level Car Parking hi Mizorama Motor dahna atana siam tawh zinga lianber leh dawng hlawk ber ani dawn a ni. Light Motor Vehicle 354 leh Two Wheeler 224 leng tura sak a ni. Floor inkalpawhna atan hian stair case leh motorable ramp (6 meter a zau) bakah lift dah tel a ni. Hemi bakah hian he building leh Secretariat building ke a kal pawhna atan Pedestrian Steel Bridge siam tel a ni bawk a ni.

Multi-Level Car Parking hi sak zawh a lo nih takah chuan Sorkar ina enkawltu tura aruat General Administration Department Govt. of Mizoram kutah hlan a ni nghal a. Secretariat leh a chhehvela Office hrang hrang dawr tute leh a thawktute tangkai taka hman a nih ngei beisei a ni.