1546/2023-2024

Khawzawl, 17th August 2023: Vawiin khan Sustainable Development Goals pakuana - ‘Fostering Industry, Innovation, Infrastructure and Livelihood Oppurtunities at Sialhawk, Lungleng and Seling’ hnuaia hmalakna pakhat ‘Pineapple Processing Plant’ lungphum phumna chu Sialhawkah neih a ni a, Deputy Chief Minister Pu Tawnluia chuan he hun hi khuallian niin a hmanpui.

Sialhawk Community Hall-a inkhawm tawi neihah khuallian Pu Tawnluia chuan Sialhawk khuaa Pineapple Processing Plant bul tan a ni thei ta chu lawmawm a tih thu a sawi a. Sialhawk khawtlang, Village Council, Pineapple Growers Society-te tawiawmnaah lawmthu sawiin Pineapple Processing Plant chu Sialhawk mipuite taimakna leh thahnemngaihna in hrinchhuah a ni, a ti. Mizoram sawrkar chuan a flagship program SEDP kaltlangin mitin huapzo hmasawnna tluantling a kalpui mek zel a ni, a ti a. Kuthnathawktute tana sawrkar hmalakna dang tarlangin Deputy CM chuan vawiina lungphum phum tak Sialhawk Pineapple Processing Plant bakah Tualte Tomato chingtu chhungkaw 250-te mamawh pipe leh silpauline pek vek an nih thu te, Tomato Processing Plant sak mek a nih thu te; Chawngtlai leh Khawhaia sapthei chingtu chhungkaw za bawr ve ve tan thirzai quintal thum theuh pek an nih tawh thu te; Riangtlei, Vangtlang leh Tualtea sial vulhtute hmalakna pawh sawrkarin nasa taka a puihbawm thu a sawi.

Deputy Chief Minister chuan khawvel sawrkar zawng zawngin ‘mitin huapzo hmasawnna tluantling - Sustainable Development Goals’ an buaipui thu sawiin, Mizoram sawrkar pawhin theihtawp a chhuah a, nodal agency Planning Department kaihhruainain a hnuaia Society- Mizoram Science, Technology & Innovation Council ( MISTIC) chuan khaw hrang hrang tlawh kualin an mamawhte an zir chiang a ni, a ti a. MISTIC hian uluk taka zirchianna a neih hnuah, Detailed Project Report (DPR) siamin North Eastern Council (NEC) in an pawm sak hnuah vawiina sanction engkim peihfel a ni ta chu thil lawmawm tak a ni, a ti.

Sialhawk lakhuihthei za zela sawmthum tawih ral thin chu Processing Plant chuan a tih ziaawm theih ngei a beisei thu Deputy CM chuan a sawi a. Processing Plant chuan kuthnathawktute tan lakhuihthei hralhchhuahna mai bakah, Sialhawk leh a chhehvel khua mipuite tan eizawnna thar chi hrang hrang - khawl enkawl, lakhuihthei phurh khawm, lei leh hralh bakah industry thil dang neuh neuh ah eizawnna tha zawk a siam ngei a beiseiawm a ni, a ti a. Sialhawk leh a chhehvel khua ten bungthar pawimawh tak an kai chu a lawmpui thu sawiin, rim taka thawka hlawkthlak taka Processing Plant chu hmang thei ngei turin duhsakna a hlan a ni.

Chief Scientific Officer & Member Secretary, Mizoram Science Technology and Innovation Council (MISTIC) Er. H. Lalsawmliana chuan Technical Report pein, Lakhuihthei hlawk zawka hralh a nih theih nan sawngbawlna hmun din a ni dawn a; juice, jam leh thildang siam chhuahna hmun tur niin Mizoram chhung leh pawn thlenga thawn chhuah tlak siam chhuah tum a ni, a ti a. Processing Plant atan hian cheng nuai 199 (19962271.47) ruahman niin 225 square feet a zau tur a ni tih a tarlang a. Mizorama hmasa ber ni turin Khawzawl KVK-ah ni zung chakna hmanga thlai vawnthatna (Solar Cold Storage) bun a nih tawh thu leh Khawzawl BDO kaltlangin Zopa siamchhuah buh vuakna, vaimim nuaina, sawhthing leh aieng herna te pekchhuah a nih mek thu a sawi bawk.

Sialhawk VCP Pu Lalremchhunga leh Pineapple Growers Society President Pu J. Rampanmawia te pawhin thu sawiin Processing Plant bultan a ni ta chu lawmawm an tih thu an sawi a. Tunhnaia lakhuihthei chingtute harsatna pakhat - zau panna kawng chhia thawmthat nana cheng nuai khat ve ve petu Deputy CM leh Khawzawl DC office chungah lawmthu an sawi bakah, Mizoram Food Processing Agency (MIFPA) in an lakhuihthei an lak theih nana hmalak saktu CM leh Deputy CM hnenah lawmthu an sawi bawk.

Sialhawk Pineapple Growers Society tarlan danin Sialhawk khua hian nikkum fur chhung khan lakhuihthei quintal 14,000 an tharchhuak a, thal laiin fur laia an thar hmun ngaa thena hmun khat an thar chhuak thung. Sialhawk khua hian Mizorama lakhuihthei tharchhuah za zela sawmruk leh pali (64%) an tharchhuak a. Khaw thenawm -Tlangpui, Tlangmawi, Chalrang, New Chalrang, Lungtan, Khawhai, Vangtlang te ho nena an tharchhuah belhkhawm hi Mizoram lakhuihthei tharchhuah za zela sawmkua leh pasarih (97%) a tling phak bawk a ni.

He hun hi Planning & Programme Implementation Secretary Pu Lalmalsawma Pachuau chuan a kaihruai a. Pineapple Growers Society aiawh ten lawmthu sawina hun hmangin, Deputy CM te nupa hnenah thilpek an hlan hnuah inkhawm hi tihtawp a ni.