1547/2023-2024

Vawiin khan School Education Minister Pu Lalchhandama Ralte chuan Mizo Zirlai Pawl Mamit Hqrs buatsaih Zirlai tiṭhate chawimawina Mamit Chhim Veng YMA Hall-a neih chu a hmanpui.

Minister chuan he hunah hian thusawiin Zirnaa hlawhtling chawimawi tur zirnaa hlawhtling ṭhahnem tak an awm chu a lawmawm hle a ni a ti a.  Minister chuan tunlai khawvel inelnaah hlawhtling tak tak tur chuan tuar chhel, taimak, tumruhna leh teirei peihna nena ṭan lak a ngai a, zirlai hlawhtling kan chawimawite chu inelna sangah tling thei tura theih tawp chhuah sauh sauh turin a fuih a ni. Minister chuan kan ramin a mamawh chu lehkha thiam hnam thinlung pu, mahni nu leh pa ṭhansan lo, khawtlang leh kohhran nun ngaihsanna chang hria hi an ni a ti.

Minister chuan zirna chu hmasawnna hnukpui innghahna a ni a, sorkar hian awmze neiin zirna a kalpui mek a ni a ti. Minister chuan Naupang te zual kaihhruai nan Zirtirh bute Nambar bute siam a ni a, naupangten an hnam ropuina leh hlutna an theihnghilh loh nan pawl VI, VII, VIII ten Zonun tih zirlaibu an zir mek a. High School zirlaiten Science leh Mathematics mahni ṭawnga an thiam theih nan Bilingual textbook siam a ni a, Higher  secondary school tan siam leh mek a ni a ti bawk. ṭawng dik humhalh nan Mizo Language Development Board din a ni a, zirna sikulah he hnam leh Kristianna dah pawimawh nan,  Ro min relsak ang che tih hla chu sak ṭhin tura tih a ni a ti bawk.

Minister chuan Zirlai naupang ṭhenkhat zingah ruihtheih thilin bu a khuar nasa hman a, a pawi hle, ruihhlo hmuh tur a tam tial tial a, kan naupangte a man beh loh nan nu leh paten mahni fate chik leh ven a pawimawh thu a sawi a.  Zirlaite chu ruihhlo ti chunga lehkha zir an hlawhtling ngai lo tih hre reng tur te,  khawi hmunah pawh hun vawng dik tur te, a hun taka thil ti turin a fuih a, ram chang apiangah hun an vawng dik a, an che pawh a rang. Hun hi a hlu a, a hlutzia hriat a pawimawh a ti a. Zirlaite chu mahni intodelh tum tur leh Lalpa ṭih tlat turin a fuih bawk.

He chawimawina huna khualzahawm Er H.Lalzirliana MLA, Vice Chairman Road & Infrastructure Development Board pawhin thu a sawi a. Mamit District chhunga zirna chawikanna atana sorkar hnathawh ṭhenkhatte a sawi a.  Hripui len laia zirna khaihlak lova sorkarin online-a zirna a kalpui te,  phaia zirlai leh hnathawkte awm te kan han hruai haw te, India leh khawvel ram hrang hrangah economy a tlak hniam laiin hripui karah ram mipuiten ei leh bara harsatna tawk lova kan awm thei te hi lawm nachang hriat a ngai hle a ni a ti. Ram ṭhenawm buai avanga Zo hnahthlak rawn raltlante kan lo tuamhlawm hi a ropui a, sorkar hi Zofate tan a ding reng a ni a ti.

Mamit-a Zirlai tiṭhate chawimawina hunah hian Mamit DEO leh DPC Pu Laldingliana, MZP President Pu Lalnunmawia Pautu te pawhin thu an sawi a. HSLC, HSSLC leh Degree Course-a tiṭhate leh Top ten-a langte chawimawina hlan an ni a. Minister hi School Education Department-a officer ṭhenkhatten an ṭawiawm a,   MZP  General Hqrs hruaitute, zirtirtute  leh zirlaite an kalkhawm a ni.