No.4407/2021-2022
Aizawl, the 25th March, 2022: NABARD (RIDF-XXV) sum cheng nuai 315.46 senga nizung chakna hmanga Tualte khaw tana tuilakna siam, Tualte Water Supply Scheme chu vawiin chawhnu khan PHE Department changtu Deputy Chief Minister Pu Tawnluia chuan a hawng. He hun hi Pu C.Lalmuanpuia, MLA, Veterinary, Fishery and Sericulture Board Vice Chairman chuan a telpui a ni.

Hawnna pual programme Vanhnuailiana Hall-a neihah Pu Tawnluia chuan thu sawiin, Water Supply Scheme hawn chu Tualte khaw tana ni chhinchhiah tlak bik tak a nih thu leh mithiam ten nitina mipakhat tui mamawh zat tur ang hisap dawng theia an awm tur leh, in tina tui connection pek tum zawhfel tep a ni tawh chu lawmawm a tih thu a sawi a. JJM, NABARD leh a dangte kaltlangin Tuichang AC bial chhunga tuilak zawhfel deuh vek tawh a ni a, hmabak Khawhaiah cheng vaibelchhe 25 sengin tuilakna siam thuai tum a ni, a ti a. A bial chhung mipuite atanga hmangaihna, duhsakna leh chawimawina a dawng thin chu ropui a tih thu a sawi bawk.

Tualte khua Tomato chingtuten Sawrkar atanga puihna mai piah lamah an kutkawih ngeia hlawhtling tuma taima taka hna an thawk thin leh Horticulture Department hmalakpuina chu fakawm a tih thu sawiin, khawdang hawi lova taima taka ching chhunzawm zel turin a chah a. Sawrkar flagship programme SEDP kaltlangin kuthnathawktute tan theihtawp chhuah tum a nih thu sawiin, a thawhkhat nan Rs. 50,000 a bultan tum a ni, a ti a. Tualte atanga Bungzung inkalpawhna siam tum pawh bawhzui mek zel a nih thu a sawi bawk.

Veterinary, Fishery and Sericulture Board Vice Chairman Pu C.Lalmuanpuia chuan khawtlang inlungrual, tumah inthliar lova khawtlang hmasawnna kawnga inthurual em em Tualte khua chu fakawm a tih thu sawiin, nizung chakna hmanga tuilakna thar an nei chu thinlung taka a lawmpui thu a sawi a. Hripui leng karah taima taka hna an thawhrah tomato in Mizoram hmun hrang hrang a thlen thu a tarlang a. An taimakna kaltlangin an tu leh fate tan hmasawnna eng an chhawpchhuah sak thu leh, Sawrkar flagship programme SEDP tihlawhtlingtu turte zinga mi an nih thu sawiin, zoram mipuite entawntlaka hna thawk zel turin a fuih a ni.

Thusawitu dang Khawzawl District Bawrhsap Pu C.C. Lalchhuangkima chuan project zawh hun bituk aia hma daiha Tualte Water Supply Scheme zawh a ni thei chu lawmawm tiin, thahnemngai taka thawka ngaihventu PHE Department changtu leh thawktute inpekna fakawm a tih thu a sawi a. Senso tlem leh hautak lo tak, nizung chakna hmanga tui pump-na Tualte khuain an nei ta chu a lawmpui thu a sawi bawk a. Tomato thar chhuak nasa leh hnathawh kawnga thalaite thanharhna hmun Tualte khuain malsawmna dawng tlaka hna an thawk thin tih chu zoram khawvelin a hriatpui tawh thu sawiin, chhawmnung zel turin a chah a ni.

Hawnna pual inkhawm buatsaih hi Er. F.Liantluanga, Chief Engineer, Zone-II, PHE Department chuan a kaihruai a. Rev. Lalduhsaka'n hunserh a hman hnuah Er. Lalzakhama, Sr.EE, Khawzawl WATSAN Division-in technical report a pe a. Tualte VCP Pu JH. Lalzemawia leh Tualte Tomato Growers Cooperative Society Ltd. President Pu R.Lalchhanchhuaha ten thu an sawi bawk a. Er. C.Lalhmachhuana, SE, Champhai WATSAN Circle-in lawmthu sawiin hun a khar a ni.

Tualte Water Supply Scheme (Solar pumping) hi June ni 23, 2020 khan bul tan niin, May ni 31, 2023 a zawh hman tura tih chu June ni 15, 2021 han zawhfel a ni a. Tui connection 196 pek chhuah niin, PHED/P&V Eastern Engineers chu Implementing Agency an ni.

Mi pakhatin nikhatah tui litre 55 zel hmang anga chhutin mi 1483 te, kum 30 lo la awm leh tur thleng chawmzo tura duan a ni a. Tui pump chhuahna atanga tuidahkhawlna Tuizem lian khaw lu a awm insanhleihna hi metre 496 a ni a, pumping station 2 dah a ni bawk. Nikhatah darkar 7 chhung tui pump thei tur leh nitin tui litre 61,600 pump thei tura duan a ni. Tui hi Bunglui leh Kawrmang atanga lak niin tuilakna pipe hi 65 mm diameter GI pipe niin tuilakna thui zawng hi km 3 chuang hret metre 3,240 a ni.

Tui pump chhuah nan hian Pumping Station 2 amite belhkhawmin avaiin Solar Power Plant 61.9 KW bun a ni a, hemi atan hian Solar Plate 185 dah a ni. Tui dahkhawlna tuizem pahnih litre 40,000 ve ve dawng Solar Plant-ah te hian siam tel a ni a, a panna kawng pawh siam tel a ni bawk.

Deputy Chief Minister hian Tualte Tomato chinna hmunte leh hmachhawpte a hmunah kalin a enfiah bawk a. Tuilakna leh dahkhawlna mamawh an thlente chu ngaihtuahsak thuai an nih tur thu a hrilh a ni.

Deputy Chief Minister hian tukin khan Shyama Prasad Mukherji Rurban Mission (SPMRM) kaltlanga cheng nuai 292.98 senga Rurban Commercial Centre (Agro Processing Centre & Warehouse) Chawngtlaia sak tur lungphum a phum bawk.

Ruahman dan chuan Sq.m 285 a zau, a dung metre 24.5 leh avang metre 11.35 a seia sak tur a ni a. Chawngtlai leh a chhehvela thlai leh thei thar chhuahte sawngbawl, hralh tura tuam mawi, a tul ang nemkai leh belte Rurban Commercial Centre-ah hian buaipui a ni dawn a. Thlai leh thei dah thatna Cold Storage bakah thlai thar zawrhna Market Shed te, Restaurant leh Office thlenga awm tura duan a ni. Rurban Commercial Centre kaltlang hian thingtlang kuthnathawka eizawngtute sum lakluh nasa taka tih pun beisei a ni.