3935/2022-2023 

Aizawl, 22nd March, 2023 : Deputy Chief Minister Pu Tawnluia chuan vawiin chawhnu khan Tuivamit khelmual (playground) sakna tur lungphum a phum.

Tuivamit khelmual sakna tur lungphum puala inkhawm Tuivamit Presbyterian kohhran hall-a buatsaihah khuallian Pu Tawnluia chuan Aizawl Smart City Project hnuaiah hian project 40 vel a awm tih sawiin, heng zinga 30 vel chu bul tan tawh a ni a, a la bang zawng pawh hi bul tan thuai turin theihtawp sawrkarina chhuah tih a sawi a. Aizawl Smart City project chu kum 2018 atanga tan nimahse COVID-19 hripui leng vangin hma rei tak kan la thei lova, boruak a ziaawm veleh theihtawpa chakin tha kan thawh a ni, a ti a. UD&PA department in hmasawnna hna a thawh kawngah mipuite tawiawmna tha an mamawh tih sawiin, tha taka heng hmalakna hna te hi tawh a nih theih nan thahnemngai taka an theihna zawn apianga thlawp thin turin mipuite a sawm a ni.

Bialtu MLA, Manpower Development Board Vice Chairman ni bawk Pu Zothantluanga pawhin Tuivamit khelmual sak a nih theihna tura hma an lak dante sawilangin, sawrkarin an duhnate a tihhlawhtlin sak avangin lawmthu a sawi a, Aizawl tlak lam veng te tan hmasawnna pawimawh tak a ni dawn tih sawiin khelmual puitling sak a nih theihna tura department ram sahthlak saktu P&E department leh AH&Vety department chungah lawmthu a sawi bawk a ni..

He Project hming hi “Construction of Playground at Tuivamit” niin, cheng nuai 697 senga sak tura ruahman a ni a. A satu contractor hi Zahnuna, Zemabawk niin kumin October thla a zawh hman tum a ni.

Tuivamit khelmual sakna atan hian Power & Electricity Department leh Animal Husbandry & Veterinary Department ten an ram an sahthlak sak a, khelmual zau zawng hi 90 m x 45 m niin phullem (astro turf) a ni a. Gallery mi 1156 thut theihna (bucket seat 180 telin) a awm dawn bakah inthiarna leh lirthei dahna (vehicle parking space) siam a ni ang a, tuichhe paihna (underground drainage) mumal tak siam a ni bawk ang.

Tuivamit khelmual sakna tur lungphum phum inkhawmah hian Pu Lalrosiama, Executive Engineer, Aizawl Smart City Limited chuan inlawmna thu a sawi a, Pu Lalrothanga, CEO, Aizawl Smart City Limited hnen atangin technical report ngaihthlak niin Pu H. Zakima, Chairman, Tuivamit Local Council in thu a sawi a. Pu H. Zonunsanga, Executive Corporator leh Pu Lalringliana, Executive Corporator ten he hun hi an hmanpui a ni.