3934/2022-2023

Mamit 22nd March, 2023 : Vawiin khan Chhimveng YMA Hall, Mamit-ah World Water Day, 2023 hman a ni a. Pu Lalnunhlua, Chairman District Water & Sanitation Mission/District Bawrhsap chuan khuallian niin a hmanpui.

Khuallian chuan World Water Day 2023 hmangtu zawng zawngte chu kan tu leh fa, chhuan lo kal lehzel tur te'n tui hman tur an neih zel theih nana hmalatu nih tum theuh tur leh midang hrilhhretu ni tura sawmin, kan ramngaw chereu zel chuan tuihna a ti tlem a, kan bawlhlawh paih fimkhur lohin kan tuilakna kawngah harsatna tam tak min thlen thin bawk, chung chingfel tur chuan Department pakhat chauh thawh theih a ni lo a, kan zavaia tanrualna leh hmalakna a ngai a ni a ti.

Khawvel ram changkang zawkte pawhin an buaipui chhoh mek, chhuan lo awm turte tana khawvel hi chenna tlak leh chen nuam a nih theih nana, tuihna humhalh, kan tuihna neih sa te duat taka enkawla, a awmsa renchem taka hman inzirtirna kalpui chu keini Mizoram pawhin kan tihmakmawh a lo ni ta a, ngaihtuahna tak tak senga, he ram tan hian kan zavaia tangruala thianghlimna leh faina kawnga tan la-in, tuihna tipunga mahni chenna theuh fai taka vawng turin kalkhawm mipuite a sawm a ni.

Dr. F. Lalbiakmawia, Asst. Hydro chuan Leilung leh tuihna tih hmangin a lem nen zirtirna a pe a, Pu H. Lalnunfela Sub. Hqrs YMA chuan thusawina neiin, MJA Mamit atangin Word Water Day, 2023 puala vengfai leh tuikhur fai endik dan tlangpui ngaihthlak niin Pu V. Laldanmawia, SDO, PHED chuan lawmthu sawina a nei bawk.

World Water Day, 2023 pual hian Vengfai leh Tuikhur fai endik niin hei bakah hian hemi pual hian Tournament buatsaih a ni bawk.

Vengfai leh Tuikhur fai lawmman hetiang hian pek an ni. Veng fai pakhatna - Venghlun, pahnihna - Luangpawl, pathumna - Hmarveng-te an ni a. Tuikhur fai, pakhatna - PWD Tuikhur (New Mamit VC), pahnihna - Chal Tuikhur (Chhimveng VC), pathumna - Zahuata Tuikhur ( Hmarveng VC) te an ni. World Water Day puala Tournament buatsaihah Champion Team hi MDFA 2nd Team niin pahnihna hi PHED Department, Mamit an ni.

World Water Day, 2023 hmanna hun hi Pi Helen Saibuangi, EE, PHED, Mamit chuan kaihhruaiin, Sawrkar Officials, tlawmngaipawl, khawthlang hruaitu, zirna lama thawkte leh zirlai bakah thutharthehdarhtute an tel a ni.