3128/2022-2023

Khawzawl, the 22nd December, 2022: Deputy Chief Minister Pu Tawnluia, 22-Tuichang Assembly Constituency bialtu MLA ni bawkin a bialchhung khaw hrang hranga upa, kum 70 chin chunglamte hnena Kristmas lo thleng tur puala blanket a pek chu vawiin khan District MUP kaltlangin Khawzawl khawpui chhungah sem chhuah a ni.

Vawiin chawhma dar 10:00 khan upate hnena blanket hlanna neih hmain inkhawm tawi, Pu Tawnluia In kawt, Khawzawl Dinthar vengah neih a ni a. Hemi hnu hian blanket sem chhuahna neih zui nghal a ni a. Khawzawl khawpui chhung bikah chuan Pu Tawnluia In kawtah Hermon, Electric, Vengthar, Kawnzar leh Khawzawl Dinthar vengte tan sem chhuah a ni a. Taidawnkawnah Zuchhip, Zaingen, Darngawn leh Arro vengte tan sem chhuah a ni bawk a. Khawzawl khawpui chhungah hian blanket 525 sem chhuah a ni.

Blanket hi 22-Tuichang AC huamchhunga kum 70 chin chunglam mi 1147 hnenah hlan a ni dawn a. Tuichang South Block huamchhungah mi 438 hnenah hlan a ni ang a, Tuichang North Block huamchhungah mi 709 hnenah hlan a ni dawn a ni.

Deputy Chief Minister Pu Tawnluia hian Kristmas lo thleng tur pualin a bial chhunga chhungkaw harsa zualte tan inhlawhna a lo siamsak tawh bawk a ni.