No.6852/2020-2021
Tukin zing khan Deputy Chief Minister Pu Tawnluia, Urban Development & Poverty Alleviation Department enkawltu Minister ni bawk chuan cheng nuai 480 senga sak tur Bungkawn Community Hall lungphum a phum a. Deputy Chief Minister hi bialtu MLA Pu V.L. Zaithanzama leh Chairman ZIDCO Pu Lalthlengliana ten an tawiawm a ni.
He programme puala inkhawm tawi Mizoram Police Subordinate Officers’ Association (MPSOA) Building Bungkawna neihah Pu Tawnluia chuan Sawrkar in kawng hrang hrangin khawpui te tih hmasawn chu a ngaih pawimawh thu sawiin UD & PA Department chu Mizoram Sawrkar hnuaia Department naupang ber te zing ami, 2006-a din chauh ni mah se nasa takin mipui tan hna an thawk a ti a. Ruhrel an sak tawh te leh mipui hman tawm theih hmunhma an sak te chu tangkai taka mipuiin an hman thu a sawi bawk. Bungkawn Community Hall sak tur pawh hi mipui tan thil tha, kawng hrang hranga tangkai taka an la chhawr tur anih ngei a beisei tih sawiin hetiang hmunhma te hi mipui ta a nih angin veng mipuite pawhin a sak laiin enpui se tiin a duh thu a sawi.
Deputy Chief Minister chuan mipui hman tawm tur ruhrel public assets a sawizaunaah, Aizawl khawpui thlanmual inhmantawm tur hmun 4 tal a buatsaih chungchangah Sawrkarin ngaihtuahna a seng mek tiin mitthi inphumna hmun hi a veng bil angin min daih rei dawn lova, chuvangin common cemetery ang te hi kan neih vat a tul dawn a, hemi kawngah hian YMA te hi ngaihtuahna min senpui turin ka ngen duh che u a ni, a ti a. Sawkarin ram leh mipuite a enkawlna kawngah Kohhran leh tlawmngai pawlte chu Sawrkar finchhuaha tawimawm turin a ngen bawk a ni.
Community Hall sakna lungphum phumna inkhawm hi Dr. C. Vanlalramsanga, Commissioner & Secretary, UD & PA Department in kaihruaiin Pu Laldinsanga Hnamte, Assistant Engineer, UD & PA Department in Technical Report a sawi a. Pu H. Lianzela, Director, UD & PA Department in lawmthu sawiin he function hi a khar a ni.
He Building hi UD&PA Department enkawlna hnuaiah State Plan Fund atangin cheng nuai 480 senga sak tur a ni a. He Hall sa tura Sawrkar atanga phalna (Administrative Approval leh Expenditure Sanction) nuai 100 Phase-I atana hmuh hmangin hma lak mek a ni.
Ruahman danah chuan Bungkawn Community Hall hi RCC Frame Structure in chhawng 6 a sak tur a ni a. Ground Floor ah chowikar chhena awmin First Floor hi Library, Store Room leh YMA Information Centre te awm tura ruahman a ni a. Second Floor ah hian Muti-purpose hall pahnih leh dressing room awmin Third Floor ah hian Parking Area siam tum a ni a. Fifth Floor ah choka/foyer leh store room dah tura ruahman niin Sixth Floor ah hian mi 180 thut theihna Auditorium siam tum a ni bawk a ni.
