No.6853/2020-2021

Er. H. Lalzirliana, 3-Mamit MLA/ Vice Chairman Road & Infrastructure Development Board chuan vawiin khan Land Resources Soil & Water Conservation Department, Mamit District chhunga Rubber chingtute hman tur Rubber Rolling Machine 22 units a vailiam.

Er. H. Lalzirliana chuan Mamit District chhunga Rubber hnaina khawl units 22 lai mai semchhuah a ni ta chu lawmawm a tih thu a sawi a, Mamit District chu Rubber-ah Mizoramah kan champion thei a ni tiin Rubber chinna turin hmunhma leh leilung tha tak kan nei a, taima leh tihtak zeta thawkin Mizoram-a Rubber tharchhuak hnem ber kan la ni dawn a ni a ti. Pu Zira chuan eizawnna kawng kan zawhna-ah hnasang leh hniam a awm lova, kuthnathawktute pawh kan in ngainep tur a ni lo a, kan thawhrim rah hi kan seng tur anih avangin a rah kan seng chho tan mek zel a ni tiin eng hna pawh thawk ila taima leh rinawm tak leh keimahni ngei lungawina khawpa kan thawh chuan a rah kan seng ngei ngei dawn a ni a ti bawk. Rubber Rolling Machine khawl thar chu Mamit District hmasawnna atana thil tangkai tak a nih a beisei thu leh Rubber huan neitute pawh dimdawi leh tangkai taka hmang turin a chah a ni. 

Mizoram Sawrkar chuan Rubber chin lama hma kan sawn nan Chief Secretary kaihruaina hnuaiah Committee pawimawh tak High Power Committee on Rural Infrastructure Development Fund (RIDF) din niin, Committee hian Rubber Processing units 50 atan Rs 680 lakhs a pawm tawh a, Department-in DPR siamin tunah hian NABARD-ah a in chiah mek a, chak taka bawhzui niin sanction theih a nih hnu chuan Rubber chingtute tan hmasawnna lawmawm tak a nih dawn thu a sawi bawk. 

Rubber Rolling Machine vailiamna hun hi Pu Z. Lalthanzuala, District Officer, Land Resources, Soil & Water Conservation, Mamit District chuan kaihruaiin Rubber chingtute atangin Pu H. Lalauva, Mamit chuan Rubber chingtute sawrkarin a ngaihsakna leh a tuam hlawmna kawngah mizoram Sawrkar chungah lawmthu a sawi bawk.

Mamit District chhungah Land Resources Soil & Water Conservation Department hriatpuia Rubber chingtu hi chhungkaw 1195 awmin Department hriatpui loha ching mi engemaw zat an awm bawk a ni. Mizoram Sawrkar-in Rubber khawl unit 100 a sem mekah Mamit District-in unit 22 kan dawn hi chhungkaw 90 te'n an in hman tawm tur niin Hachhek Constituency tan 10 unit, Dampa Constituency tan 4 unit leh Mamit Constituency tan 8 unit semchhuah a ni a, he khawl hian hmanraw chi hrang hrang keng telin khawl man hi Rs 88.350.00/- a ni a. A dawngtu ten Rs 10,000/- in an do let dawn bakah khawl dahna tur In leh a urna tur Smoke House an in ngaihtuah bawk ang.

Vawiin Rubber Rolling Machine sem tur vailiamna hunah hian sawmbik Officials, khawtlang hruaitu, thutharthehdarhtute leh Rubber chingtute an tel a ni.