No.6854/2020-2021

Vawiin hian Serchhip District Land Resources, Soil  & Water Conservation Office tualah Serchhip District chhunga Rubber chingtu chhungkaw 7 te hnena hlan tur Rubber Rolling Machine leh a sawngbawlna hmanraw kim chu Er. Lalrinawma, Dy. Speaker, Mizoram leh Tuikum bialtu MLA ni bawk chuan a vai liam. 

Khawl vai liam puala inkhawm tawi buatsaihah Er. Lalrinawma chuan, Serchhip District a chhungkaw 58 zetin Rubber huan neia hma an la mek te, an zinga chhungkaw 20 te phei chu hnai thei tawh khawpa an lo thawkrim te, Mizoramah rubber hnai theih tawh kung nuai hnih vel zet kan nei mek te chu chanchin lawmawm tak nia a hriat thu a sawi a. Serchhip District ah hetiang khawl dawng thei khawpa hna an lo thawkrim chu sawrkar tan pawh a lawmawm a ni, a ti. Mizoram chu tlangram a nih avangin bungrua chet kual tir vel a hautak a, link road hi hmun tinah kan mamawhna a sang hlawm em em mai a ni. Hei vang hian kuthnathawktute pawh hian thlai thar rit sak, thiar vel hautak chi, kan hlawkna ei heu nasa thei chi te kalsan a, a zangkhai chi kan dap nasat a tul nia a hriat thu sawiin, rubber pawh chutiang atana tha tak nia a ngaih thu Er. Lalrinawma hian a sawi bawk a ni. Programme hman zawh hian heng khawlte hi a vai liam a, a dawngtu tur chhungkuate hmunah hlan an ni zui ang.

Inkhawm tawi hi Pu P. Lalbiakkima, Serchhip DO in a kaihruaia report tlangpui pein tuna Rubber chingtuten khawl leh hmanraw dang an dawn te hi an mamawh kim biai awmna a nih thu a tarlang a, Mizoramah khawl 100 sem tur niin Serchhip district ah 7 an sem thu a  tarlang. A dawngtute hi Keitum khuaah pahnih, Tlungvelah pakhat leh Serchhip ah pali an ni a, heng khawlte hi Rubber chingtu chhungkaw dangte pawhin an hman tawm ve thei dawn a ni a ti. Tin, khawl leh hmanraw sem zawng zawng hlut zawng hi Rs. 88355 a ni a, a dawngtu chhungkua ten Rs. 10,000/- a an dolet ve thu a tarlang bawk. 

Khawl dawngtute aiawhin Pu H. Lianhrima Serchhip leh Pu K. Lalhluna, Tlungvel ten thusawina hun an hmang ve bawk a ni.

He hunah hian Serchhip distict a Soil department thawktute bakah Pu C. Rinsangpuia, RO, Aizawl te, Serchhip a District Officer sawm bik te an tel a ni.