No.475/2020-2021 

UD&PA changtu Deputy Chief Minister Pu Tawnluia hovin vawiin khan UD&PA Department hotute nen a pisaah khawpui chhung mi retheite tana luanchhuah programme thawhkhatna neih a ni a. He hunah hian BSUP-a cheng chhungkaw 586 hnenah tanpuina sem a ni.

Pu Tawnluia chuan COVID19 in khawvel pum a tihbuai laiin Mizoram Sawrkar chuan Chief Minister Pu Zoramthanga kaihhruainain nasa takin Mizoram mipui kan him theih nan tan a la a; kohhran, tlawmngai pawl, political party te leh mipuiin sawkar hmalakna an tawiawm tha a, sawrkar ruahmanna tipuitling zawngin thahnemngai taka an tang tlang chu a lawmawm takzet a ni, a ti. COVID19 donaa thawktu Health Department mi leh sa te, police te, mi tlawmngai inpe Local leh Village Level Task Force te, sawrkar department hrang hranga thawkte leh mipuite hnenah Deputy Chief Minister chuan lawmthu a sawi a. He natna laka kan him theihnan sawrkarin inkharkhip ‘lockdown’ tha taka an zawm avangin Mizoram mipuite hnenah lawmthu a sawi a ni.

Inkharkhip kalpui a nih avangin rethei zawk te leh nitina inhlawhfa te dinhmun nasa takin a nghawng tih sawiin Deputy Chief Minister chuan an tana luanchhuah hi sawrkarin a ngai pawimawh, a ti a. Sawrkarin mahni in leh lo nei lote tana chenna in a buatsaih Aizawl khawpui chhunga BSUP-a chengte tan a thawhkhatna ah tanpuina sem a ni a, hei hi khawpui dang 22 ah te pawh chhunzawm a ni ang, a ti bawk.

Tun dinhmunah Lawipu BSUP-ah chhungkaw 359, Edentharah 104, Rangvamualah 123, belhkhawmin chhungkaw 586 te an cheng mek a. Chhungkaw tin hnenah alu kg 5, chini kg 2, tel liter 2, dal kg 2, purunsen kg 1 leh damdawi leina turin cheng 300 theuh vawiin hian pek an ni. Mizoramah hian urban town Aizawl tiamin 23 a awm mek a. BSUP a chengte bakah khawpui chhunga mi retheite dinhmun zirchiangin sawrkar chuan data a khawn khawm a. A rang lamin heng mi harsa Mizoram khawpui hrang hranga awmte hnenah hian chhawmdawlna pek an ni ang. Survey hi Aizawlah chuan UD&PA Directorate in a kalpui a. District dangah chuan District Urban Development Officer (DUDO) te leh Autonomous District Council-ah chuan District Programme Officer ten an kalpui thung a ni.

Vawiin programme-ah hian Aizawl West I bialtu MLA Pu Zothantluanga, UD&PA Secretary Dr C Vanlalramsanga, UD&PA officer dangte bakah Rangvamual, Edenthar leh Lawipu BSUP a cheng chhungkuate aiawhin mi pahnih theuh an tel a ni. Luanchhuah programme hawn a nih hnuah hian BSUP a chengte chu an chenah inah UD&PA staff-ten chhawmdawlna an pe nghal a ni.