1802/2022-2023
Aizawl, the 2nd September 2022 : Deputy Chief Minister Pu Tawnluia hovin vawiinah Chief Secretary Conference Hall ah Mizoram chhunga lui te humhalh nana Dan siam leh duan tur chungchang ‘The Draft Mizoram Protection Bill’ sawi khawm a ni a. He meeting pawimawh takah hian Agriculture Minister Pu C. Lalrinsanga, Fisheries Minister Pu Lalrinliana leh Land Revenue Minister Pu Lalruatkima te bakah Chief Secretary Dr Renu Sharma leh Planning & Programme Implementation Department; PHE Department; Irrigation & Water Resources, Law & Judicial Department-a Secretary-te, CYMA, FLAM leh Mizoram State Pollution Control Board aiawhte an tel a ni.

Meeting a tel ten Mizorama lui te humhalh kawnga thil pawimawh leh tul nia an hriat te chu zau takin an sawiho a. Lui bakah leiverha a tui lakchhuah mekte humhalh leh khuahkhirh pawh he dan siam tur hian huam se tih te, Mizorama lui te hi a zau thei ang ber huam se tih te sawilan a ni a. Meeting chuan he dan ruangam duangchhuak turin Sub Committee din an rel a; Sub Committee-a Chairman turin Agriculture Minister Pu C. Lalrinsanga an ruat a, Member Secretary ah PHE Secretary chu ruat a ni bawk a. Anni bakah hian Member dangte pawh ruat an ni a. Vawiina meeting hian Sub Committee chuan PHE Department leh Environment, Forest & Climate Change Department ten lui humhalh nana dan an duan chin te chu enmil se tiin an rawt bawk a ni.