1801/2022-2023
Aizawl 2nd September 2022 : Pu C.Lalrosanga MP(Lok Sabha) chuan vawiin Sept ni 2 khan Guwahati-ah hmarchhak bial MP te leh North Frontier Railway hotute thutkhawmnaah thusawiin Bairabi leh Sairang inkar relkawng siam mek bakah Sairang atanga Mizoram chhim lam thleng relkawng siam turin railway thuneitute chu a ngen a. 2023 December thlaa zawh hman tum KM 51 vela thui Bairabi-Sairang relkawng piah lamah Lawngtlai district a Hmawngbuchhuah thlenga relkawng siam tumna tihlawhtling ngei turin railway hotute chu a ngen a ni.

Km 223 a thui ni tura survey pawh lo neih tawh leh enfiah tawh he relkawng thar siam rawtna hi kaltlangpui theih loh tura ngaih lo ni tawh mahse Act East Policy nena inzulin Kaladan Multi Modal Transit Transport Project nen pawha inzawm thei turin a tangkai thei hle dawn a ni tih a sawi.

NF Railways General Manager Pu Anshul Gupta chuan Hmawngbuchhuah thlenga relkawng siam tum hi tihtlang tum a ni a ti a. Tunah hian Sairang a rel station changkang tak, chhawng thum, Square metre 6372 a zau din mek a ni a. Metre 6 a zau, subway a nei ang tih a sawi a. Bairabi-Sairang relkawng siam mek atan hian cheng vaibelchhe 6527 ruahman a ni a ti.

Pu C Lalrosanga chuan Bairabi-Sairang relkawng siamna hna chak taka thawh mek a nih chu lawmawm a tih thu a sawi a. Khawvel pum huap pawha changkang, World Class ni tura Sairang rel station ruahman a ni chu lawmawm a tih thu a sawi bawk.